اخلاق احمد آہن کی منتخب غزلیں اور نظمیں۔
لگا کے آگ بجھانے کی بات کرتے ہو (غزل)
لگا کے آگ بجھانے کی بات کرتے ہو
پھپھولے دل میں سجانے کی بات کرتے ہو
نہیں سمجھتے مری حالت دروں کو تم
فقط جو کرتے بہانے کی بات کرتے ہو
سناؤں میں جو کبھی حال اپنی الفت کا
ثبوت مجھ سے دکھانے کی بات کرتے ہو
گزار کر میں یہاں آیا ہوں شب ظلمت
کرم نہ کر کے جلانے کی بات کرتے ہو
جو پوچھتا ہوں کبھی بے رخی کی میں علت
بنا کے بات بنانے کی بات کرتے ہو
کبھی ستم پہ جو بھرتا ہوں آہ تب بھی تو
مرے لہو میں نہانے کی بات کرتے ہو
ترے حضور میں آیا جو آہن بے بس
پنہا کے بیڑی نہ جانے کی بات کرتے ہو
یہ غازہ ہے کاجل ہے ابٹن ہے کیا ہے (غزل)
یہ غازہ ہے کاجل ہے ابٹن ہے کیا ہے
یہ رنگ حنا داغ دامن ہے کیا ہے
لٹک ہے مٹک ہے جھٹک ہے ادا ہے
کھٹک ہے دھڑک ہے کہ دھڑکن ہے کیا ہے
حیا کی بہاریں ہیں رعنائیوں پر
یہ جلوہ ہے مستی ہے جوبن ہے کیا ہے
یہ پھیلی ہوئی خوشبوؤں کی گھٹائیں
یہ گیسو ہے کاکل ہے الجھن ہے کیا ہے
تبسم کی بجلی قیامت کی شوخی
یہ باراں ہے بادل ہے کڑکن ہے کیا ہے
جو ساز ستم ہر طرف بج رہا ہے
وہ پائل ہے چوڑی ہے کنگن ہے کیا ہے
یہ کیسی جگہ ہے کہ دل کھو رہا ہے
بیاباں ہے صحرا ہے گلشن ہے کیا ہے
کہوں میں کبھو شعر ایسا تو کہیے
شرارت ہے لغزش ہے بھٹکن ہے کیا ہے
جنوں کا اثر آہنؔ بے نوا پر
یہ جادو ہے ٹونا ہے بندھن ہے کیا ہے
محبوبہ اور موت میں اک مماثلت ہے (نظم)
محبوبہ اور موت میں اک مماثلت ہے
کہ مجھے دونوں سے محبت ہے
اے موت کیا بتاؤں کہ
تیرے جیسا کون ہے
کہ جس سے مجھ کو پیار ہے
کہ اس پہ سب نثار ہے
میں چاہتا ہوں اس کو بھی
تیری طرح تیری طرح
ہاں وہ بھی تیرے جیسی ہے
میں ڈھونڈھتا ہوں دونوں کو
خلاؤں میں فضاؤں میں
اے موت اب کہاں ہے تو
کدھر میں ڈھونڈھتا پھروں
کبھی قریب آئے تو
کبھی ہاں مسکرائے تو
مگر نہ سمجھے مجھ کو تو
نہ اعتبار مجھ پہ ہو
تو بات مانے اوروں کی
طبیب کی حکیم کی
کہیں جو غیر سن لے تو
سنے نہ میری بات تو
عجیب بات ہے بھی یہ
لگاؤ نا گلے کبھی
نہ دے مجھے تو پیار ہی
یہ کیسی بے بسی مری
نہ تو ملے نہ پریت ہی
یہ دونوں ایک جیسی ہیں
مجھے سمجھتی ہی نہیں