آرسی کی غزلیں — Aarsi Ghazals

آرسی کی منتخب غزلیں اور نظمیں۔

دن کے سارے کاری لمحے رو بیٹھے (غزل)

دن کے سارے کاری لمحے رو بیٹھے

یاد میں اس کی بیٹھے بیٹھے رو بیٹھے

آج بھرے بازار میں بے بس اپنی ہی

تنہائی پر ہنستے ہنستے رو بیٹھے

دن میں اس پیلے کمرے کی خاموشی

رات میں اس کے کالے سائے رو بیٹھے

عشق میں یہ بھی عجب مقام اک آیا تھا

وہ سویا تھا تکتے تکتے رو بیٹھے

اک کردار فلم کا بالکل ہم جیسا

اک جوکر کے دیکھ ٹھہاکے رو بیٹھے

پلک میں اپنی پکڑ نہ پائی (غزل)

پلک میں اپنی پکڑ نہ پائی

قریب تھی سو نظر نہ آئی

جو چن لیا وہ نہیں تھا چاہا

جو چاہیئے تھا نہ تھی رسائی

کبھی نہیں تھی دوا پرانی

نئی نئی تھی کبھی شفائی

شجر گھنا ہو گیا ہے دل کا

طویل ڈالی کی کر چھنٹائی

پانی جم کر ہوا روپہلا (نظم)

پانی جم کر ہوا روپہلا

برف ہے لیکن سرد نہیں ہے

سوکھی ماٹی پر دھندھلکا

کہرا ہوگا گرد نہیں ہے

سکھ معصوم ہے چھپا نہیں ہے

غم کوئی بھی فرد نہیں ہے

یہ سب جو کہتی رہتی ہوں

یہ میرا دیوانہ پن ہے

درد نہیں ہے درد نہیں ہے

پٹی باندھ رکھی انگلی پر

گہرے بھید گیا تھا نشتر

کہتی رہتی تھی وہ سب سے

ہاتھ پکڑ پر دیکھ سنبھل کر

زخم اچھوتا رکھ کر چھو لے

ہے کوئی ہمدرد نہیں ہے

ڈر بس زخم کے رسنے کا ہے

اس کو کوئی چھوڑ گیا ہے

اس کو کوئی توڑ گیا ہے

رشتوں کی دیوار سرخ ہے

سر کوئی پھر پھوڑ گیا ہے

توڑ گیا جو چھوڑ گیا جو

دل اس کا بے درد نہیں ہے

ٹوٹے چھوٹے دل ہنستے ہیں

سب نے سچ کا سواد چکھا ہے

کون سکھی ہے کون سکھا ہے

سلوٹ بھر مسکان کا پردا

رخ سے رخ تک اوڑھ رکھا ہے

کاغذ کا نقلی گلدستہ

سوکھا ہے پر زرد نہیں ہے

دیکھو سب ہیں شاد یہاں پر

کن دھاگوں نے باندھا ہم کو

کن دھاگوں کو باندھا ہم نے

پھول گانٹھ سے باندھی خوشیاں

گانٹھ سے گانٹھ کو باندھا غم نے

گانٹھ گٹھیلا جیون سارا

ان گانٹھوں کا میل نہیں ہے

کیوں سلجھائیں کاٹ نہ دیں کیوں

جال ہے آخر جیل نہیں ہے

کچھ مجبور ہیں کچھ ہیں عادی

کچھ اتنے بے درد نہیں ہیں

حال جو پوچھو سب بڑھیا ہے