عارف نقشبندی کی منتخب غزلیں اور نظمیں۔
یہ محبت کا صلہ تھا عشق کا انجام تھا (غزل)
یہ محبت کا صلہ تھا عشق کا انجام تھا
پھول کا ہنسنا ہی اس کی موت کا پیغام تھا
غم نہ دیتے آپ تو راحت سے کس کو کام تھا
زندگی کی گردشوں کے ساتھ دور جام تھا
ٹھوکریں کھاتے گئے لب پر تمہارا نام تھا
حشر کا منظر تھا راہ عشق میں جو گام تھا
آپ کیوں آنسو بہائیں میرے حال زار پر
عشق کا نکلا وہی انجام جو انجام تھا
بن گیا ہر سانس قاتل رنج ہے تو بس یہی
زندگی نے مار ڈالا موت پر الزام تھا
تھا تمہارے سامنے بے کیف رنگ گلستاں
دیدۂ نرگس تو کہنے کو چھلکتا جام تھا
دیکھنے والے کہیں گے میری بربادی کا حال
آشیانہ جل رہا تھا میں اسیر دام تھا
گریۂ شبنم سے آتی ہے گلوں میں تازگی
میرا رونا بھی کسی کے عیش کا پیغام تھا
برق کے کیا ہاتھ آیا کیا ملا صیاد کو
چار تنکوں کے نہ رہنے سے چمن بدنام تھا
جلنے والا ہی سمجھ سکتا ہے دل کی آگ کو
ہجر میں عارفؔ مرا ہمدم چراغ شام تھا
دیکھا تھا کس نظر سے تم نے ہنسی ہنسی میں (غزل)
دیکھا تھا کس نظر سے تم نے ہنسی ہنسی میں
اک درد مستقل ہے اب میری زندگی میں
کعبہ بھی بت کدہ بھی ہے راہ بندگی میں
یہ منزلیں ہیں کیسی دشوار عاشقی میں
اے دوست یاد ان کی اب تک رلا رہی ہے
دو دن جو مل گئے تھے ہنسنے کو زندگی میں
اک بات پر ہماری الجھن میں پڑ گئے تم
دنیا نہ جانے کیا کیا کرتی ہے دوستی میں
جب ہوش میں رہا میں چھپتے رہے وہ مجھ سے
پردے ہٹا دیے سب دیکھا جو بے خودی میں
اے میری شام فرقت یوں دل نہیں بہلتا
کچھ اور روشنی کر تاروں کی روشنی میں
منزل پہ مجھ کو لا کر دامن جھٹک رہے ہو
یاد آئے گا مجھے یہ احسان زندگی میں
دور خزاں سے اب تو بہلا رہا ہوں دل کو
کانٹوں میں پھنس گیا ہوں پھولوں کی دوستی میں
تو ان کے سامنے ہو وہ تیرے سامنے ہوں
ایسا بھی ایک سجدہ عارفؔ ہو بے خودی میں