آلِ عمر کی منتخب غزلیں اور نظمیں۔
کروں گا عشق وراثت کا کچھ بتاؤں گا نئیں (غزل)
کروں گا عشق وراثت کا کچھ بتاؤں گا نئیں
میں اک غریب کی بیٹی کو آزماؤں گا نئیں
انہیں کہو کہ بہت ڈھیر شور و شر نہ کریں
میں ڈر گیا تو کئی روز مسکراؤں گا نئیں
تسلی دوں گا تو مر جائے گی وہ لڑکی ہے
میں جانے دوں گا گلے سے اسے لگاؤں گا نئیں
اسے خبر بھی نہیں ہوگی اتنا چاہوں گا
اسے پتہ بھی نہیں ہوگا میں بتاؤں گا نئیں
یہ راستہ بڑی مشکل سے طے کیا میں نے
یہ فاصلہ ہے دلوں کا اسے مٹاؤں گا نئیں
ترا مطالبہ ہے تیری یاد کے آنسو
میں اب کے رویا تو آنکھوں کو بھی بچاؤں گا نئیں
اور اب کی سالگرہ پر پلان کیا ہے ترا
اور اب کی بار تو میں سامنے بھی آؤں گا نئیں
میں تجھ سے آنکھ ملا کر غزل سناؤں گا
میں خود کو ڈوبتا دیکھوں گا اور بچاؤں گا نئیں
دوسرا عشق مری جان نہیں کر سکتا (غزل)
دوسرا عشق مری جان نہیں کر سکتا
یہ ترا حافظ قرآن نہیں کر سکتا
ایسی حالت میں ترے خواب سے لوٹا ہے یہ جسم
میں ابھی وصل کا سامان نہیں کر سکتا
دسترس میں ہے مری کیف بھی کیفیت بھی
زخم بھر کر مجھے حیران نہیں کر سکتا
ان پہ غالب ہے کئی چہروں کے اشراک کا دین
تو ان آنکھوں کو مسلمان نہیں کر سکتا
پہلی قسطوں میں تری موت نہیں ہو سکتی
اپنے تھیٹر کو میں ویران نہیں کر سکتا
یہ مرا آخری پتھر ہے تری یاد میں دوست
اب میں پانی کو پریشان نہیں کر سکتا