اکھلیش تیواری کی غزلیں — Akhilesh Tiwari Ghazals

اکھلیش تیواری کی منتخب غزلیں اور نظمیں۔

ہنسنا رونا پانا کھونا مرنا جینا پانی پر (غزل)

ہنسنا رونا پانا کھونا مرنا جینا پانی پر

پڑھیے تو کیا کیا لکھا ہے دریا کی پیشانی پر

مہنگائی ہے دام ملیں گے سوچا تھا ہم نے لیکن

شرمندہ ہو کر لوٹے ہیں خوابوں کی ارزانی پر

اب تک اجڑے پن میں شاید کچھ نظاروں لائق ہے

ورنہ جمگھٹ کیوں امڈا رہتا ہے اس ویرانی پر

رات جو آنکھوں میں چمکے جگنو میں ان کا شاہد ہوں

آپ بھلے چرچا کریے اب سورج کی تابانی پر

صبح سویرا دفتر بیوی بچے محفل نیندیں رات

یار کسی کو مشکل بھی ہوتی ہے اس آسانی پر

اس کی سپنوں والی پریاں کیوں میں دیکھ نہیں پاتا

بچہ حیراں ہے مجھ پر میں بچے کی حیرانی پر

ایک اچھوتا منظر مجھ کو چھو کر گزرا تھا اب تو

پچھتانا ہے خود میں ڈوبے رہنے کی نادانی پر

ہم فنکاروں کی فطرت سے واقف ہو تم تو اکھلیشؔ

مقصد سمجھو رک مت جانا بس لفظوں کے معنی پر

روشنی کے نہ تھے آثار بند کمرے میں (غزل)

روشنی کے نہ تھے آثار بند کمرے میں

وہ تو لو دے اٹھا کردار بند کمرے میں

ہے گزر اپنا ہی مشکل تو پھر تعجب ہے

کس طرح آ گیا بازار بند کمرے میں

شعر جتنے کہے خارج کیے سوا اس سے

صرف پرزوں کا ہے انبار بند کمرے میں

چاند تاروں سے الگ ایک اور دنیا ہے

بانچتا تھا کوئی اخبار بند کمرے میں

تجربہ خوب ہے اس پر عمل بھی کرنا ہے

رہنا ہے خود سے ہی ہشیار بند کمرے میں

جوڑ کر رکھتا تھا دنیا سے جو وہ ہی احساس

اب پڑا رہتا ہے بیمار بند کمرے میں

سچ اگر جھوٹ کو تسلیم کر بھی لوں تو انا

روٹھ کر کرتی ہے تکرار بند کمرے میں