ہم راہ (زویا حسن)
قسط نمبر 11
________________
"ارسہ۔۔۔۔۔۔ !” ا س نے لب ہلائے۔۔۔۔
میں بدستور اس کی آنکھوں میں دیکھتی رہی۔۔۔۔
اس نے اپنی انگلی سے میرے ماتھے کی لٹ ہٹائی۔۔۔
بجلی کی رفتار سے ۔۔۔ سرد لہر میرے جسم سے گزر ی۔۔۔۔ اس کی سانسیں سمندر کی بےباک موجوں کی طرح میرے جسم کے ساحل سے ٹکرا رہی تھیں۔۔۔
ایک دم سے دروازہ کھلا۔۔۔۔۔۔۔۔۔۔۔۔ میں نے خوفزدہ ہوکے آنکھیں بند کیں۔۔۔۔
احمر بھی چونک کے پیچھے ہٹا۔۔۔۔
"ماموں۔۔۔۔۔ !” پَری کی آواز ہمارے کانوں میں گونجی
ہم دونوں نے اپنے حواس بحال کرنے لگے۔۔۔
"آپ دونوں یہاں پہ کیا کررہے ہیں۔۔۔۔؟” پَری پاس آ کے بولی
"کچھ نہیں بیٹا۔۔۔ ارسہ آنٹی کی آنکھ میں کچھ چلا گیا تھا۔۔۔۔ بس وہی نکال رہا تھا۔۔۔۔” احمر نے جھوٹ بولا
میں جلدی سے کمرے سے باہر نکل آئی۔۔۔۔۔
میری سانسیں ابھی تک پھولی ہوئی تھیں۔۔۔۔۔ باہر مہمانوں کا رش لگ گیا تھا۔۔
"اے۔۔۔۔۔۔ ! کب سے ڈھونڈ رہی ہوں تمہیں۔۔۔۔ کہاں تھی۔۔۔؟” مدیحہ نے پیچھے سے میرا کندھا تھپتھپایا۔۔۔
میں نے مڑ کے اسے دیکھا۔۔۔
"سب ٹھیک ہے نا۔۔۔۔۔۔؟ تمہارے گال اتنے سرخ کیوں ہورہے ہیں۔۔۔ اور اتنی ہڑبڑائی ہوئی سی کیوں ہو۔۔۔۔؟” مدیحہ میری حالت کا بغور جائزہ لینے لگی۔۔۔
"نہیں ۔۔۔۔ وہ۔۔۔۔ بس ۔۔۔ میں ۔۔۔۔پانی پی کے آئی۔۔۔۔۔” میں نے وہاں سے دوڑ لگا دی
کیچن میں جا کے تین گلاس ٹھنڈا پانی پی کے میں نے اپنے آپ کو نارمل کیا۔۔۔۔
جب سارے مہمان جمع ہوگئے تو پرَی کو کیک کاٹنے کے لیے بلایا گیا۔۔۔۔
برتھ ڈے سانگ پہ تالیوں کی گونج میں پَری نے کیک کاٹا۔۔۔۔ کیک کا سب سے پہلا ٹکڑا احمر کے منہ میں ڈالا اور دوسرا ساجدہ آنٹی کے۔۔۔۔ اچانک ہی اسے میرا بھی خیال آگیا۔۔۔۔ میں مسکرانے لگی۔۔۔۔
احمر کی شرارتی نگاہیں۔۔ بار بار میرا تعاقب کررہی تھیں۔۔۔ اور میں اس سے نظریں چرا رہی تھی۔۔۔۔۔
"میڈم۔۔۔ ! ہوا کیا ہے۔۔۔۔ ؟” مدیحہ پاس آکے بولی
"نہیں۔۔۔ ! کچھ بھی تو نہیں۔۔۔۔” میں نے جواب دیا
"ایسے کیسے کچھ نہیں۔۔۔۔۔؟ صاف لگ رہا ہے کہ کوئی تو بات ہے۔۔۔۔” وہ جاننے کے لیے بضد تھی
اتنے میں ساجدہ آنٹی نے اعلان کیا کہ کھانا کھل چکا ہے۔ کھانے کا انتظام لان میں کیا گیا تھا۔ سبھی مہمانوں نے لان کا رخ کیا۔ میں مدیحہ کے ساتھ باہر آگئی ۔ خالہ اندر ہی جاننے والی خواتین کے ساتھ خوش گپیوں میں لگی تھیں۔ میں نے ان کے لیے پلیٹ میں گاجر کا حلوہ ڈالا اور لے کے اندر چلی آئی۔۔۔ ساجدآنٹی نے مجھے آواز دی کہ پلیٹیں کم پڑ گئی ہیں کیچن سے کچھ پلیٹیں لے کے میں باہر لے آؤں میں نے جلدی سے خالہ کو حلوے کی پلیٹ تھمائی اور کیچن میں چلی گئی۔۔۔۔ مجھے اس بات کا بالکل اندازہ نہیں تھا کہ احمر بھی میرے پیچھے پیچھے کیچن میں آگیا۔۔۔۔
میں کیبنٹ سے پلیٹیں نکالنے لگی۔۔۔ اس نے میرے پاس آکے گلہ صاف کیا۔۔۔۔ میں چونکی ۔۔۔۔
"مے آئی ہیلپ ۔۔۔ یو۔۔۔۔۔۔؟” وہ بولا
"نو۔۔۔ تھینکس۔۔۔” میں نے ناگواری سے جواب دیا اور پلیٹیں ڈسٹر سے صاف کرنے لگی۔۔
"سنو۔۔۔۔ !” اس نے سرگوشی کی
"سن رہی ہوں۔۔۔۔” میں نے بنا دیکھے جواب دیا
"میری طرف دیکھو۔۔۔۔!” وہ میرے قریب آیا
"کیوں۔۔۔؟” میں نے اب بھی سر نہیں اٹھایا
"کچھ کہنا ہے۔۔۔۔۔۔!”
"تو۔۔۔۔ کہو۔۔۔”
"آنکھوں میں دیکھ کے کہنا ہے۔۔۔۔۔”
"میں کانوں سے سنتی ہوں۔۔۔۔”
"پر یہ آنکھوں سے سننے والی بات ہے۔۔۔۔”
"جو بولنا ہے ایسے ہی بول دو۔۔۔۔۔”
"کیوں۔۔۔؟ میری طرف دیکھتے ہوئے ڈر لگتا ہے۔۔۔؟”
"نہیں تو ۔۔۔۔ میں کیوں ڈروں گی۔۔۔۔۔؟”
"تو دیکھو میری طرف۔۔۔۔۔”
"نہیں دیکھوں گی۔۔۔۔”
"مطلب تم ڈرتی ہو۔۔۔۔۔”
"نہیں ڈرتی۔۔۔۔۔۔ ” میں نے سر اٹھا کے اسکی طرف دیکھا
اسکے ہونٹوں پہ وہی معنی خیز مسکان تھی۔۔۔۔
میں نے شرما کے نظریں جھکا لیں۔۔۔
"نہ۔۔۔۔ نہ۔۔۔۔ ایسے تو نہیں چلے گا۔۔۔۔۔”
میں نے پھر سے نظریں اٹھائیں۔۔۔
"ہاں ۔۔۔ بولو۔۔۔ میں سن رہی ہوں۔۔۔۔!” میں نے اپنے چہرے پہ بناوٹی سنجیدگی سجا لی
"کہہ دوں۔۔۔۔۔۔؟” اس نے پھر سے سرگوشی کی
"ہاں۔۔۔ کہہ دو۔۔۔۔ ” میں نے جواب دیا
"شیخیاں بھگار رہے ہو۔۔۔۔۔ پر ایسا نہیں کہ بچی کی مدد کردو۔۔۔۔” ساجدہ آنٹی کیچن میں داخل ہوئیں
میں واپس پلیٹیں صاف کرنے پہ لگ گئی اور وہ اپنی بغلیں جھانکنے لگا۔۔۔۔
"آنٹی آپ چلیں بس میں ابھی پلیٹیں لے کے آئی۔۔۔۔۔” میں ساجدہ آنٹی سے مخاطب ہوئی
"اچھا۔۔۔ بیٹا۔۔۔ ! جتنی صاف ہوگئی ہیں۔۔۔ وہ احمر کو دو۔۔۔ مہمان باہر انتظار کررہے ہیں۔۔۔” انھوں نے صاف پلیٹیں اٹھا کے احمر کے ہاتھ میں رکھ دیں
تھوڑی دیر بعد مہمان ایک ایک کرکے جانے لگے۔۔۔۔ مدیحہ بھی اپنی امّی کے ساتھ چلی گئی۔۔۔ جب پورا گھر خالی ہوگیا تو خالہ اور میں بھی گھر جانے کے لیے کھڑے ہوگئے۔ ساجدہ آنٹی نےشکریہ اور دعاؤں کے ساتھ میرے سر پہ بوسہ دیا۔ ہم انکے گھر کے مین گیٹ سے نکل کے گلی میں آگئے۔۔۔۔ احمر باہر ہی مہمانوں کو روانہ کررہا تھا۔۔۔۔ ایک دم سے اسکی نظر مجھ پہ پڑی۔۔۔۔ اور پھر دیر تک وہ یونہی دیکھتا رہا۔۔۔۔ جب تک میں اپنے گھر میں داخل نہیں ہوگئی۔۔۔۔۔ ایک عجیب سی کشش تھی اسکی آنکھوں میں۔۔۔۔۔ میں سمجھ نہیں پا رہی تھی کہ یہ کیسا احساس ہے۔۔۔۔ ؟ کیوں میں اسکے پاس کھنچتی چلی جارہی ہوں۔۔۔۔
میرے دماغ میں کئی سوال تھے۔۔ کئی انکہی باتیں تھیں جو آنکھوں ہی آنکھوں میں ہم ایکدوسرے سے کہہ تو چکے تھے لیکن ہونٹوں سے اقرار اب بھی باقی تھا۔۔۔۔۔۔ کہیں یہ صرف میرا وہم نہ ہو۔۔۔۔۔ بار بار یہ خوف بھی ستا رہا تھا۔۔۔
ـــــــــــــــــــــــــــــــــــــــــــ
میں باتھ روم سے نہا کے نکلی تو مدیحہ کی تین مسڈکالز آئی ہوئی تھیں۔۔۔
میں نے جلد سے بال خشک کیے اور اس کال بیک کی۔۔۔۔
"کہاں ہو یار۔۔۔۔ ؟ کب سے فون ٹرائی کررہی ہوں۔۔۔۔” کال اٹنڈ کرتے ہی وہ بولنا شروع ہوئی
"میں نہا رہی تھی۔۔۔۔ خیریت ہے نا۔۔۔۔؟” میں نے حیران ہو کے پوچھا
"ہاں ۔۔۔ ہاں خیریت ہے۔۔۔۔۔ بس تمہیں بتانا تھا کہ آج شام سات بجے تیار رہنا۔۔۔ میں تمہیں گھر سے پِک کروں گی” وہ بولتی گئی
"ہیں۔۔۔۔ ! پر جانا کہاں ہے۔۔۔۔؟ ” میں نے پوچھا
"سرپرائز ہے بے بی۔۔۔۔۔۔ !” وہ ہمیشہ کی طرح اپنے مستی والے انداز میں بولی
"او ہیلو۔۔۔۔ ! تمہارے سرپرائزز میرے لیے جان لیوا ثابت ہوتے ہیں۔۔۔۔ مزید ہمت نہیں ہے مجھ میں۔۔۔۔” میں نے تنک کے جواب دیا
"اوہو۔۔۔ کم آن ۔۔۔ ڈارلنگ۔۔۔۔ ایک تو تم ڈرتی بہت ہو۔۔۔۔۔ بس میں نے کہہ دیا نہ تیار رہنا۔۔۔۔” وہ بولی
"جب تک اس سرپرائز کا خلاصہ نہیں کرو گی۔۔ تب تک سوچنا بھی مت کہ میں تمہاری کوئی بات ماننے والی ہوں۔۔۔” میں سنجیدہ ہوگئی
"ارے یار۔۔۔۔۔ ! ایکچولی۔۔۔ فہیم کراچی سے واپس آگیا ہے۔۔۔ ہم دونوں نے مووی دیکھنے کا پلان بنایا۔۔۔ سوچا تم لوگوں کو بھی انوائیٹ کرلیتے ہیں۔۔۔ بہت مزہ آئے گا۔۔۔۔” اس نے اصل بات بتا دی
"ہیں۔۔۔۔ ! جانا کہاں ہے۔۔۔؟” میں نے جھٹ سے پوچھا
"بحیریہ آرچرڈ۔۔۔۔۔ فہیم نے چار ٹیکٹس لے لی ہیں۔۔۔۔ ”
"چار ۔۔۔۔؟ چار ٹیکٹس کیوں۔۔۔؟ ہم تو تین لوگ ہیں نا۔۔۔۔؟” میں نے پوچھا
"آئے۔۔۔ ہائے۔۔۔۔ تمہارے والے سڑو۔۔۔۔کو بھی ساتھ لے چلتے ہیں نا۔۔۔۔ تم اکیلی ایک کونے میں بیٹھ کے بور نہ ہوتی رہو۔۔۔” وہ ہنستے ہوئے بولی
"احمر۔۔۔۔۔ ! احمر کو بھی بلا لیا۔۔۔۔۔۔ ؟” مجھے حیرانی ہوئی
"ہاں۔۔۔ ! کیوں۔۔۔؟ تمہیں کمپنی دے گا بیچارہ ۔۔۔اور کیا۔۔۔۔۔”
"مجھے کسی کی کمپنی کی ضرورت نہیں ہے۔۔۔۔ سمجھی۔۔۔۔ اور میں نہیں آرہی۔۔۔۔؟”
"وائے۔۔۔۔۔ وائے۔۔۔۔۔۔؟”
"بس۔۔۔۔ میرا موڈ نہیں ہے۔۔۔۔ اور ویسے بھی خالہ نہیں مانیں گی۔۔۔۔۔ سوری بھئی میں تو نہیں آسکتی۔۔۔۔۔” میں نے ہاتھ کھڑے کردیے
"ابھی تو اچھل اچھل کے پوچھ رہی تھی کہاں جانا ہے۔۔۔۔ اور ایکدم سے ارادہ بدل گیا۔۔۔۔۔ سمجھ گئی ۔۔۔ سمجھ گئی۔۔۔۔ احمر کی وجہ سے نا۔۔۔۔۔؟” وہ نان سٹاپ بولتی گئی
میں نے کوئی جواب نہیں دیا۔۔۔۔
"اف۔۔۔ یہ مشرقی لڑکیاں بھی نا۔۔۔۔۔۔ ! اندر سے چاہے لڈو پھوٹ رہے ہوں۔۔۔ لیکن باہر سے انکار ہی ہوگا۔۔۔۔ ڈیپلومیٹک لوگ۔۔۔۔۔ ” اس نے طنز کیا
"کیوں۔۔۔۔ ؟ لڈو کیوں پھوٹیں گے بھلا۔۔۔۔۔؟” میں تیوری چڑھا کے بولی
"ہاں ۔۔۔ ہاں۔۔۔ میں تو چھوٹی بچی ہوں نا۔۔۔۔۔ کل سالگرہ میں۔۔۔ موصوف کو دیکھ دیکھ کے گالوں پہ جو لالیاں اتر رہی تھیں۔۔۔ سب پتا چل رہا تھا۔۔۔۔۔” اس نے میری دکھتی رگ پہ ہاتھ رکھ ہی دیا
"شٹ اپ ۔۔۔ ! مدیحہ۔۔۔۔ کچھ بھی بکواس کرتی رہیتی ہو۔۔۔۔” میں تنک کے بولی
"چوری پکڑی گئی بچو۔۔۔۔۔ ! اب چپ چپ تیار ہو جاؤ۔۔۔ ورنہ ۔۔۔ ساجدہ آنٹی کو پنڈی بھجوانا پڑے گا۔۔۔۔” وہ قہقہہ لگا کے بولی
"مدیحہ۔۔۔۔۔ ! کسی دن میرے ہاتھوں قتل ہو جاؤ گی تم۔۔۔۔۔۔” میری ہنسی نکل گئی
"میڈم۔۔۔۔ ! آپ تو پہلے ہی اپنی آنکھوں کے وار سے کسی کو گھائل کرچکی ہیں۔۔۔۔!” وہ کسی صورت پیچھے نہیں ہٹ رہی تھی
"اب اپنی بک بک بند کرو اور یہ بتاؤ کہ خالہ کو کیسے منانا ہے۔۔۔۔؟” میں نے بات بدل دی
"انکی فکر تم مت کرو۔۔۔۔ میں نے بات کرلی ہے۔۔۔۔۔ ” اس نے تسلی دی
"ہیں۔۔۔ ! تو وہ اتنی آسانی سے مان بھی گئیں۔۔۔۔۔؟” مجھے حیرانی ہوئی
"مانتی کیسے نہیں۔۔۔۔ میں نے کہا آنٹی۔۔۔۔ ارسہ کچھ دنوں میں واپس چلی جائے گی۔۔۔ اسے تھوڑا گھوم پھر لینے دیں۔۔۔ پنڈی میں جا کے بیچاری آہیں ہی بھرا کرے گی۔۔۔۔۔ تو بس انھوں نے کہہ ٹھیک ہے بیٹا۔۔۔۔ کہہ دو میری بھانجی کو’جا ارسہ۔۔۔۔! جی لے اپنی زندگی۔۔۔۔” وہ پھر سے اپنے ڈرامائی انداز میں شروع ہوگئی۔۔۔
میں نے ہنس کے فون بند کردیا۔۔۔
صبح کے گیارہ بج رہے تھے۔۔ ابھی تو کافی ٹائم ہے۔۔۔۔ میرے دل میں خیال آیا کہ ایک بار خالہ سے خود بھی بات کرلوں۔۔۔ ایسا نہ ہو پچھلی بار کی طرح کلاس ہو جائے۔۔۔۔ خالہ نجمہ کو پرانے کپڑے نکال کے دے رہی تھیں۔۔۔ میں انکے پاس جا کے بیٹھ گئی۔۔
"خالہ۔۔۔ ! مدیحہ کا فون آیا تھا۔۔۔؟” میں نے پوچھا
"ہاں۔۔۔۔ آیا تو تھا۔۔۔۔۔” وہ بولیں
"کیا کہہ رہی تھی۔۔۔۔؟”
"وہی جو۔۔۔ تم نے اسے کہا۔۔۔۔” انھوں نے جواب دیا
"ہیں۔۔۔۔ ! میں نے ۔۔۔ کیا کہا اسے۔۔۔؟” میں حیران ہوئی
"یہی کہ۔۔۔ تم مدیحہ کے ساتھ سینما فلم دیکھنے جانا چاہتی ہو۔۔۔ اسکے بعد تم گھر چلی جاؤ گی ۔۔۔ پھر موقع نہیں ملے گا” وہ ایک ایک کرکے پوائنٹ گنوانے لگیں
"اوہ مائی گاڈ۔۔۔۔ ! مدیحہ کی بچی نے سارا مدعا مجھ پہ ڈال دیا ہے۔۔۔۔ اسکی تو خیر نہیں۔۔۔۔” میں جل بھن گئی
اب اگر خالہ کے سامنے کوئی صفائی دیتی ہوں تو الٹا پھنس جاؤں گی، چپ رہنے میں ہی بھلائی ہے۔
"بیٹا۔۔۔۔ ! میں نے تمہیں جانے کی اجازت تو دے دی ہے لیکن اپنی ماں سے اسکا ذکر مت کرنا۔۔۔ ورنہ وہ مجھے سے لڑائی کرے گی کہ میری جوان امان بیٹی کو سینما بھیج دیا۔۔۔۔ بس دھیان سے جانا اور جلدی واپس آجانا۔۔۔ ساجدہ کا بیٹا بھی جارہا ہے۔۔۔۔؟” انھوں نے پوچھا
"پتا۔۔۔ نہیں خالہ۔۔۔۔ شائد مدیحہ نے اسے بھی کہا ہو۔۔۔۔؟” میں نے لاعلمی ظاہر کی
"ہاں۔۔۔ مدیحہ بتا رہی تھی۔۔۔۔ کہ وہ بھی ساتھ جائے گا۔۔۔ چلو اچھی بات ہے۔۔۔۔ کسی مرد کا ساتھ ہونا ضروری ہے۔ ۔ لیکن بیٹا۔۔۔ اس سےلڑائی جھگڑا مت کرنا۔۔۔۔ ” خالہ مجھے سمجھاتے ہوئے بولیں
اف۔۔۔ ایک تو سب کو یہی لگتا ہے میں ہی اس سےلڑتی ہوں۔۔۔ وہ جیسے دودھ کا دھلا ہے۔ اس بار بھی میں نے سر جھکا لیا۔
وہاں سے اٹھ کے میں چھت پہ آگئی۔۔۔ لیکن مدیحہ پہ مجھے شدید غصہ تھا۔۔۔
ــــــــــــــــــــــــــــــــــــــــــ
سات بجنے والے تھے۔ میں جانے کے لیے بالکل تیار تھی۔ مدیحہ کو میسج کیا تو اسکا کوئی جواب نہیں آیا۔ میں سوچ میں پڑ گئی جانے کا پلان ہی نہ بدل گیا ہو۔۔۔۔ اگلے ہی پل اسکا فون آگیا۔
"سو سوری یار۔۔۔۔۔ ! ایک چھوٹا سا پرابلم ہے۔۔۔” وہ اداس ہوکے بولی
"اب کیا ہوا۔۔۔۔ ؟” میں مایوس ہوگئی
"اصل میں فہیم اور میں گھر سے پہلے ہی نکل آئے تھے۔۔۔ اور ابھی راستہ میں ہی ہیں۔۔۔۔ اگر تمہیں پِک کرنے کے لیے آئے تو زیادہ دیر ہوجائے گی۔۔۔ تو تم ایک کام کرو نا۔۔۔۔” گاڑیوں کے شور سے صاف لگ رہا تھا کہ وہ واقعی راستے میں ہے
"کیا۔۔۔۔ ؟” میں نے پوچھا
"تم احمر کے ساتھ آجاؤ نا۔۔۔۔ وہ بھی ابھی گھر سے نکلنے والا ہے۔۔۔۔ میں نے اسے میسج کردیا ہے۔۔۔ وہ تمہیں ساتھ لے آئے گا” اس نے میرے سر پہ بم پھوڑا
"مدیحہ۔۔۔۔۔ !” میں بھڑک گئی
"پلیز۔۔۔۔۔ پلیز۔۔۔۔ سیچوئیشن سمجھنے کی کوشش کرو یار۔۔۔۔ بعد میں لڑ لینا۔۔۔۔ وی آر گیٹنگ لیٹ۔۔۔ اسے کال کرلو۔۔۔۔ وہ ویٹ کررہا ہوگا تمہارا۔۔۔۔” ساتھ ہی اس نے فون بند کردیا
"یہ لڑکی مجھے کہیں کا نہیں چھوڑے گی۔۔۔۔۔۔!” میں تپ گئی
میرے موبائل کی میسج ٹون بجی۔۔۔
"مس ارسہ۔۔۔۔ ! میں گلی میں آپکا ویٹ کررہا ہوں۔۔۔۔۔” احمر کا میسج تھا
ساتھ ہی گاڑی کے ہارن کی آواز میرے کان میں پڑی۔۔۔
اب اگر جانے کا ارادہ ترک کرتی ہوں تو خالہ سو سوال پوچھیں گی۔۔۔۔ اسکے ساتھ جاتی ہوں تو۔۔۔۔ نہیں ۔۔۔ نہیں۔۔۔۔ کیا کروں۔۔۔۔۔
پھر سے اسکا میسج آیا۔۔۔۔۔
"بی کوئیک ۔۔۔ پلیز۔۔۔۔۔!”
"اوکے۔۔۔۔ آئی۔۔ ایم۔۔۔ کمنگ۔۔۔۔” میں نے ریپلائی کیا
خالہ سے اس بار جھوٹ بولنا مناسب نہیں ہے۔۔۔ بہتر ہے انھیں سب سچ بتا دوں کہ میں احمر کے ساتھ جارہی ہوں۔۔۔ میں نے بڑی ہمت سے انھیں بتا دیا کہ مدیحہ اپنے کزن کے ساتھ راستے میں ہے ۔۔۔ یہاں سے میں احمر کے ساتھ ہی جارہی ہوں۔ خالہ کا ردعمل میری سوچ کے برعکس نکلا۔۔ انھوں نے مجھے جانے کی اجازت دی اور تاکید کی کہ جلدی لوٹ آؤں۔۔۔ ایک بار پھر گاڑی کا ہارن بجا۔۔۔ میں بھاگتی ہوئی گیٹ کے پاس پہنچی۔۔۔۔
اس کی طرف بڑھتا میرا ہر ایک قدم دھڑکنیں بڑھا رہا تھا۔ جب اس سے دشمنی چل رہی تھی اس وقت بھی اس کے قریب جانے سے اتنا ڈر نہیں لگتا تھا۔۔۔ جتنا اب لگ رہا ہے ۔۔۔۔ گاڑی کے پاس پہنچی تو اس نے میرے لیے ڈوراوپن کرکے اندر بیٹھنے کا اشارہ کیا۔۔۔۔ میں سہم کر سیٹ پہ بیٹھ گئی۔۔۔ اس نے گاڑی سٹارٹ کی۔۔۔۔ کافی دیر ہم دونوں خاموش بیٹھے رہے۔۔۔
پھر اس نے بات شروع کی۔۔۔۔
"کل ہم لوگ۔۔۔ ‘کّلر کہار’ جارہے ہیں۔۔۔۔ پکنک منانے۔۔۔”
"اچھا۔۔۔ ! یہ تو اچھی بات ہے۔۔۔۔” میں نے جواب دیا
"پَری اور نومی ضد کررہے تھے کہ آپ کو بھی ساتھ لے چلیں۔۔۔ لیکن۔۔۔” وہ بولا
جواباً میں خاموش رہی
"لیکن میں نے اور امّی نے انھیں سمجھایا کہ ہر وقت آپ کو ایسے تنگ کرنا مناسب نہیں ہے۔۔۔۔ ویسے بھی ۔۔۔۔”
وہ کچھ کہتے کہتے رک گیا۔۔۔
میں بتدریج چپ تھی۔۔۔۔ اس نے پھر سے اپنی بات جاری رکھی
"ہمارا رشتہ بھی کیا ہے آپ سے۔۔۔۔۔ ” ا س نے میرے چہرے پہ اپنی نظر ڈالی
میرے پاس اب بھی اسکی بات کا کوئی جواب نہیں تھا۔۔۔ میں نے نظریں جھکا لیں۔۔۔
"مس ارسہ ۔۔۔ میں صحیح کہہ رہا ہوں نا۔۔۔۔؟” اس نے پوچھا
گاڑی مال روڈ سے کینال روڈ پہ مڑی۔۔۔
میں کہیں کھو سی گئی۔۔۔۔
ہم دونوں کے بیچ حائل خاموشی کی اس دیوار کو توڑنے کے لیے اس نے میوزک آن کیا۔۔۔
شام کی ہلکی سی سیاہی چاروں طرف پھیل رہی تھی۔۔۔۔ گاڑیوں کی جگمگاتی لائٹیں جگنو ؤں کی طرح ٹمٹمانے لگیں۔۔۔
عاطف اسلم کا ایک گانا ہلکی آواز میں گونجنے لگا۔۔۔۔
"کسی شام کی طرح ۔۔۔۔ تیرا رنگ ہے کھلا۔۔۔۔
میں رات اِک تنہا۔۔۔۔۔ تْو چاند سا ملا۔۔۔۔۔۔۔
ہاں تجھے دیکھتا رہا۔۔۔۔۔۔۔ کسی خواب کی طرح۔۔۔
جو ۔۔ اب سامنے ہے تْو۔۔۔ ہو کیسے یقین بھلا۔۔۔۔۔
ٹوٹا جو کبھی تارا۔۔۔۔ سجنا وے
تجھے رب سے مانگا۔۔۔۔
رب سے جو مانگا ملیا وے۔۔۔۔۔
تْو ملیا تو جانے نہ دوں گا میں۔۔۔۔۔ ”
دل کی باتیں زبان تک تو آچکی تھیں، پر لب لرز رہے تھے۔۔۔۔ ہر احساس عیاں تھا۔۔۔ بس کچھ لفظ تھے جو۔۔ سینے میں گھٹ رہے تھے۔۔۔۔ وہ آگے بڑھے یا میں۔۔۔ ہم دونوں اسی شش وپنج میں تھے۔۔۔۔۔ سب کچھ ایک حسین خواب کی مانند تھا۔۔۔۔ میں خوفزدہ تھی کہ یہ خواب کہیں ٹوٹ نہ جائے۔۔۔۔
"ارسہ۔۔۔۔ !” احمر کی آواز میرے کان میں پڑی
میری دھڑکنیں۔۔۔ بے ربط ہوئیں۔۔۔
"مجھے تم سے کچھ کہنا ہے۔۔۔۔۔!”
میرے ہاتھ پیسنے سے تر ہونے لگے۔۔۔۔ میں نے دونوں ہتھیلیاں بند کیں۔۔۔
وہ کچھ بولا تو شائد یہ دل سینہ چیر کے باہر ہی نا آجائے۔۔۔۔ میں اپنے آپ کو سنبھالنے لگی۔۔۔
ایک دم سے گاڑی جھٹکے مارنا شروع ہوئی۔۔۔۔ اس نے جلدی سے سڑک کے کنارے بریک لگا دی
"شٹ۔۔۔۔ اسے کیا ہوا ہے۔۔۔۔۔ ؟” وہ جلدی سے نیچے اترا۔۔۔
گاڑی کے انجن سے دھواں نکل رہا تھا۔۔۔ میں بھی اسکے پیچھے پیچھے گاڑی سے اتر آئی۔۔۔
"کیا ہوا۔۔۔۔۔ ؟” میں نے پوچھا
"انجن کی بینڈ بج گئی۔۔۔۔۔ کافی دیر سے پرابلم کررہا تھا۔۔۔ میکنک کے پاس جانے کا ٹائم ہی نہیں ملا۔۔۔۔ ” اس نے سر پکڑ لیا
"اب کیا ہوگا۔۔۔۔۔؟” میں نے پریشان ہو کے پوچھا
"ہونا کیا۔۔ ہے۔۔۔۔ بلاتا ہواںکسی کو۔۔۔۔ آپ مدیحہ کو فون کریں کہ وہ لوگ آپ کو یہاں سے پِک کرلیں مجھے شائد ٹائم لگ جائے گا” اس نے مایوس ہو کے کہا۔۔
میں نے مدیحہ کا نمبر ڈائل کیا۔۔۔۔ احمر بھی کسی سے بات کرتے ہوئے سڑک کے کنارے چلتا ہوا گاڑی سے چند قدم کے فاصلے پہ جا کے کھڑا ہوگیا۔۔
"کہاں رہ گئے ہو بھئی۔۔۔۔۔ ! کب تک پہنچنا ہے؟َ” مدیحہ فون اٹنڈکرکے بولی
"یار ۔۔۔ ! احمر کی گاڑی خراب ہوگئی ہے۔۔۔۔۔ ہم راستے میں ہی رکے ہیں۔۔۔ ” میں نے اسے بتایا
"اوہ۔۔۔۔ تو اب۔۔۔؟” وہ سوچ میں ڈوب گئی
"اب کیا۔۔۔ تم لوگ پِک کرنے آؤ گے اور کیا۔۔۔” میں نے تنک کے جواب دیا
"اوکے۔۔۔۔ ! لوکیشن بتاؤ۔۔۔۔ میں اور فہیم آرہے ہیں۔۔۔” وہ بولی
"آئی گس۔۔۔۔ ہم ڈاکٹرز ہوسپیٹل کے پاس ہی ہیں۔۔۔۔۔ ایک منٹ ۔۔۔۔مَیں احمر سے تمہاری بات کراتی ہوں” میں نے احمر کو اشارہ کیا۔۔۔ وہ اسی طرح اپنا فون کان کے ساتھ لگائے میری طرف بڑھنے لگا۔۔۔۔ اناً فاناً ون وہیلینگ کرتے ہوئے دو لڑکوں کی بائیکس ایکد وسرے سے ٹکرائیں۔۔۔۔ اگلے ہی لمحے ایک بائیک بے قابو ہو کے احمر کو پیچھے سے آ لگی۔۔۔۔ بائیک اتنی تیز تھی کہ احمر کئی فٹ زمین سے اوپر اٹھا اور پھر روڈ سے جا ٹکرایا۔۔۔۔۔
میرے پاؤں کے نیچے سے زمین نکل گئی،۔۔۔۔۔ ہاتھ سے فون چھوٹا اور میں بھاگتی ہوئی اسکے پاس پہنچی۔۔۔ اسکا سر پھٹ چکا تھا۔۔۔۔ خون کا ایک فوارہ جاری تھا۔۔۔۔۔ میرے اوسان خطا ہوگئے۔۔۔۔۔ وہ میرے سامنے تڑپ رہا تھا۔۔۔ اور میں گھٹنوں کے بل بیٹھ کے اسکی یہ حالت دیکھ رہی تھی۔۔۔۔
"احمر۔۔۔۔۔ ! احمر۔۔۔۔۔ !” میں پاگلوں کی طرح اسے پکار رہی تھی۔۔۔۔ جب میرے حواس نے ساری حدیں عبور کرلیں تو میں نے اپنا ماتھا اسکے لرزتے جسم پہ ٹیک دیا۔۔۔۔۔
بقیہ اگلے حصے میں۔
____________________

جواب دیں
تبصرہ کرنے سے پہلے آپ کا لاگ ان ہونا ضروری ہے۔