( غیــر مطبــوعــہ ) بُتِ خود سَر منانے کو مجھے خ…

( غیــر مطبــوعــہ )

بُتِ خود سَر منانے کو مجھے خود آ گیا ہے
سَــمُندر سے پہـاڑوں کی طرف دریا بہا ہے

سَراشکِ غم کو مِژگاں پر حقارت سے نہ دیکھو
فصـــیلِ شب پہ یہ اُمّیـــــــــــــد کا جـــلتا دیا ہے

لچک دونوں طرف موقف میں کچھ باقی نہیں ہے
مگر دیکھـــــو ‘ بســـــاطِ گُفت گُو کیسی بپا ہے !

خــزاں نے اپنا سارا خـــوں کیا نذرِ بہــــــاراں
اگر اب بھی نہ گل مہکے تو توہینِ صـــبا ہے

تعجُّب کیا ‘ جو حَبـسِ ہجر سے جاں پر بنی ہے
تعَــرُّض کیا ‘ جو ڈھہ جـــانے کـو دیوارِ انا ہے

اُسے مِل کر بچھــــڑنے کا لــگا رہتا تھا دھـــڑکا
بچھڑ کر اُس سے’ کب ملتے ہیں اب یہ دیکھنا ہے

طلســــــم آباد میں کس کو یہاں زَعــــــمِ نظر ہے
ســـــرِ ہر آئنـــہ عکسِ گُلِ حیـــــرت کِھــــــلا ہے

اُسی آہُــو کی دُھن میں قافلــے بھٹکے ہیں ســـارے
وہ جس سے سر بَہ سر صحراے جاں مہکا ہوا ہے

ظفــــرؔ ! بس دیــدنی ہے خــــانہؑ نیرنگِ فطرت
اِسی باعث تو شـــــاید دیـــدہؑ تصــــــــویر وا ہے

( قـاضــی ظفــرؔ اِقبــال )