سرورِ دو جہاں تاجدار شہاں رحمت بیکراں جنت…
سرورِ دو جہاں تاجدار شہاں
رحمت بیکراں جنت عاصیاں
باعث زندگی مقصد کن فکاں
عدل کی روشنی پیار کا کارواں
میر انسانیت پیر محنت کشاں
قبلہء بے جہت منزل عاشقاں
برج محمود کے شاہد و رازداں
عبد و معبود کے درمیاں درمیاں
آپ کی رہ گزر کہکشاں کہکشاں
سایہ بھی صبح گر آہٹیں بھی اذاں
نقش پا کی مرید سرحد لا مکاں
بے کسوں کی امید بے نوا کی زباں
ثبت کردار پر ان گنت خوبیاں
مجھ گنہگار پر مستقل مہرباں
میرے پیارے حضور شان رب غفور
زندگی کا سرور غمگسار نشور
رب مسجود کا ایک چوتھائی نور
یعنی معبود کا بندگی میں ظہور
آپ کو دیکھ کر سنگدل چکنا چور
آپ کے حسن پر آئنوں کو غرور
فقر ، جان غنا انکساری ، غیور
خاک پا آئنہ آئنہ برق طور
خوان خیر البشر جو کی روٹی ، کھجور
ان کے قاری شجر ان کے ذاکر طیور
شہر علم و یقیں بحر عقل و شعور
اتنا دل کے قریں جتنا آنکھوں سے دور
وہ سراپا کرم میں مجسم، قصور
حشر کا کیوں ہو غم ہوگی بخشش ضرور
بے مثال و مثیل عکس رب جلیل
عاقلوں کے عقیل عادلوں کے عدیل
فصحاء کے فصیح وکلاء کے وکیل
وارث حرف و صوت والی قال و قیل
زندگی جیسی موت وقف جیسا رحیل
تندرست ان کا دیں سب مذاہب علیل
حق کے وہ ہم نشیں ان کا دعوی دلیل
ان کا مٹی کا گھر روشنی کی فصیل
ان کا سن مختصر ان کے سجدے طویل
ان کے تلوے ملے عارض جبرئیل
ان کے قدموں تلے حشر کا سنگ میل
جنگلوں میں بنیں انگلیاں بھی سبیل
صرف میرے نہیں کل جہاں کے کفیل
(مظفر وارثی)
انتخاب :-: ابوالحسن علی ندوی