ادریس آزاد کی غزلیں — Idris Azad Ghazals

ادریس آزاد کی منتخب غزلیں اور نظمیں۔

یوں بظاہر تو پس پشت نہ ڈالو گے ہمیں (غزل)

یوں بظاہر تو پس پشت نہ ڈالو گے ہمیں

جانتے ہیں بڑی عزت سے نکالو گے ہمیں

اپنا گھر بار ہے ابعاد مکانی سے بلند

وقت کو ڈھونڈنے نکلو گے تو پا لو گے ہمیں

اتنے ظالم نہ بنو کچھ تو مروت سیکھو

تم پہ مرتے ہیں تو کیا مار ہی ڈالو گے ہمیں

تم نہیں آئے نہیں آئے مگر سوچا تھا

ہم اگر روٹھ بھی جائیں تو منا لو گے ہمیں

ہم ترے سامنے آئیں گے نگینہ بن کر

پہلے یہ وعدہ کرو پھر سے چرا لو گے ہمیں

تم بھی تھے بزم میں یہ سوچ کے ہم نے پی لی

ہم اگر مست ہوئے بھی تو سنبھالو گے ہمیں

قابل رحم بنے پھرتے ہیں اس آس پہ ہم

اپنے سینے سے کسی روز لگا لو گے ہمیں

ہم بڑی قیمتی مٹی سے بنائے گئے ہیں

خود کو ہم بیچنا چاہیں گے تو کیا لو گے ہمیں

ہم بھی کچھ اپنی تمنائیں سنائیں گے تمہیں

جب تم اپنی یہ تمنائیں سنا لو گے ہمیں

تم سے ہم دور چلے آئے ہیں صدیوں کے قریب

روشنی بن کے اگر آؤ تو آ لو گے ہمیں

ہم نہ بھولیں گے تمہیں جتنی بھی کوشش کر لو

بھولنے کے لیے ہر بار خیالو گے ہمیں

ہم بدلتے نہیں بدلتے ہیں (غزل)

ہم بدلتے نہیں بدلتے ہیں

اس لیے ہم سے لوگ جلتے ہیں

وقت کا کون انتظار کرے

چل زمانے کے ساتھ چلتے ہیں

غم نکلتے تو ہیں پہ گاہ بگاہ

آہ کے ڈر سے کم نکلتے ہیں

آپ ہی عمر کا خیال کریں

یہ تو ارمان ہیں مچلتے ہیں

تم نہ آؤ تو میری آنکھوں میں

پھول کھلتے نہیں ہیں کھلتے ہیں

چاند کے ساتھ ہم ابھرتے ہیں

لوگ سورج کے ساتھ ڈھلتے ہیں