حسن عباس رضا کی منتخب غزلیں اور نظمیں۔
میں تلاش میں کسی اور کی مجھے ڈھونڈھتا کوئی اور ہے (غزل)
میں تلاش میں کسی اور کی مجھے ڈھونڈھتا کوئی اور ہے
میں سوال ہوں کسی اور کا میرا مسئلہ کوئی اور ہے
کبھی چاند چہروں کی بھیڑ سے جو نکل کے آیا تو یہ کھلا
وہ جو اصل تھا اسے کھو دیا جسے پا لیا کوئی اور ہے
کٹی عمر ایک اسی چاہ میں اسے دیکھتے کسی راہ میں
مگر اک زمانے کے بعد جو ہوا آشنا کوئی اور ہے
فقط ایک پل کے فراق میں کئی خواب کرچیاں ہو گئے
جو پلٹ کے آئے تو یوں لگا یہاں سلسلہ کوئی اور ہے
وہی لوگ ہیں وہی نام ہیں وہی گھر وہی در و بام ہیں
مگر اب دریچوں کی اوٹ سے ہمیں جھانکتا کوئی اور ہے
کسی آنے والے سفر کی جب کرو ابتدا تو یہ سوچنا
میں اکیلا اس میں شریک ہوں کہ مرے سوا کوئی اور ہے
اسے مل کے آئے تو شام کو مجھے آئنہ نے کہا سنو
وہ جو صبح دم تھا حسن رضاؔ وہ تمہی ہو یا کوئی اور ہے
آنکھوں سے خواب دل سے تمنا تمام شد (غزل)
آنکھوں سے خواب دل سے تمنا تمام شد
تم کیا گئے کہ شوق نظارہ تمام شد
کل تیرے تشنگاں سے یہ کیا معجزہ ہوا
دریا پہ ہونٹ رکھے تو دریا تمام شد
دنیا تو ایک برف کی سل سے سوا نہ تھی
پہنچی دکھوں کی آنچ تو دنیا تمام شد
شہر دل تباہ میں پہنچوں تو کچھ کھلے
کیا بچ گیا ہے راکھ میں اور کیا تمام شد
عشاق پر یہ اب کے عجب وقت آ پڑا
مجنوں کے دل سے حسرت لیلیٰ تمام شد
ہم شہر جاں میں آخری نغمہ سنا چلے
سمجھو کہ اب ہمارا تماشا تمام شد
اک یاد یار ہی تو پس انداز ہے حسنؔ
ورنہ وہ کار عشق تو کب کا تمام شد
تم جو لفظوں کے گورکھ دھندے میں الجھے (نظم)
تم جو لفظوں کے گورکھ دھندے میں الجھے
بے رس شاعری کرتے ہو
لغت سے لفظ اٹھاتے ہو
اور دائیں بائیں ان کو چبا کر
شعر اگلتے رہتے
تم کو کیا معلوم
کہ کیا ہے عشق اور اس کی حقیقت کیا ہے
پیار ہے کیا اور چاہت کیا ہے
تم نے کسی کے ہجر میں کب
راتیں کاٹی ہیں…؟
کب تم وصل کے نشے سے سرشار ہوئے ہو
کہ ہونٹوں کا رس کیا ہوتا ہے
کیسے آنکھ سے گرتے آنسو موتی بن جاتے ہیں
تم کو کیا معلوم کہ کیسے
بازوؤں میں آ کر محبوب پگھل جاتے ہیں
تم کو کیا معلوم محبت کیا ہوتی ہے
تم کو کیا معلوم جدائی کی شب کیسے کٹتی ہے
اور دن کتنے ویراں ہوتے ہیں
تم کو کیا ہے
تم تو اپنی بیویوں سے بھی
ڈرے ڈرے
شرمندہ شرمندہ ہم بستری کرتے ہو
تم کو کیا معلوم ہے
شاعری
پورا مرد اور پوری عورت مانگتی ہے
تم نے کسی ہجڑے کے لب پر
شعر کا پھول کھلے دیکھا ہے
اس کی اجڑی ویراں آنکھ میں
نظم کا دیپ جلے دیکھا ہے
یہ تو ہو سکتا ہے
(اور اکثر ایسا ہوتا آیا ہے)
شاعر، ہجڑے ہو جاتے ہیں
لیکن کوئی ہجڑا
شاعر ہو نہیں سکتا
شاعری پورا مرد
اور پوری عورت مانگتی ہے