حکیم محمد اجمل خاں شیدا کی منتخب غزلیں اور نظمیں۔
درد کو رہنے بھی دے دل میں دوا ہو جائے گی (غزل)
درد کو رہنے بھی دے دل میں دوا ہو جائے گی
موت آئے گی تو اے ہمدم شفا ہو جائے گی
ہوگی جب نالوں کی اپنے زیر گردوں بازگشت
میرے درد دل کی شہرت جا بجا ہو جائے گی
کوئے جاناں میں اسے ہے سجدہ ریزی کا جو شوق
میری پیشانی رہین نقش پا ہو جائے گی
کاکل پیچاں ہٹا کر رخ سے آؤ سامنے
پردہ دار حسن محفل میں ضیا ہو جائے گی
جب یہ سمجھوں گا کہ میری زیست ہے ممنون مرگ
موت میری زندگی کا آسرا ہو جائے گی
انتظار وصل کرنا عمر بھر ممکن تو ہے
گو نہیں معلوم حالت کیا سے کیا ہو جائے گی
محتسب اور ہم ہیں دونوں متفق اس باب میں
برملا جو مے کشی ہو بے ریا ہو جائے گی
میں ابھی سے جان دے دوں گا جو راہ عشق میں
انتہا مجنوں کی میری ابتدا ہو جائے گی
فاش راز دل نہیں کرتا مگر یہ ڈر تو ہے
بے خودی میں آہ لب سے آشنا ہو جائے گی
باریاب خواب گاہ ناز ہونے دو اسے
ان کی زلفوں میں پریشاں خود صبا ہو جائے گی
مقصد الفت کو کر لو پہلے شیداؔ دل نشیں
ورنہ ہر آہ و فغاں بے مدعا ہو جائے گی
مریض عشق کی جز مرگ دنیا میں دوا کیوں ہو (غزل)
مریض عشق کی جز مرگ دنیا میں دوا کیوں ہو
اگر جاں ہو عزیز اپنی تو جاناں پر فدا کیوں ہو
اٹھے جو آگ سینہ سے دبا دوں اس کو اشکوں سے
شب ہجراں میں نالہ سے مرا لب آشنا کیوں ہو
ملو خلوت میں اور دو تم مجھے درس شکیبائی
کرم تم میں نہ ہو تو دل مرا صبر آزما کیوں ہو
چلے جب تک زباں جاری ہو اس پر داستان غم
توانائی ترے بیمار کی صرف دعا کیوں ہو
بھلا تو اور گھر آئے مرے کیوں کر یقیں کر لوں
تخیل کیوں نہ ہو میرا تری آواز پا کیوں ہو
اگر بخت رسا نے رہبری کی تیری خلوت تک
تو پھر دست تمنا رہن دامان قبا کیوں ہو
مرے خوں اور حنا میں دیر سے باہم رقابت ہے
نہ ہو گر رنگ خوں پا میں تو پھر رنگ حنا کیوں ہو
قیامت ایک دن آئی ہے اس میں شک نہیں شیداؔ
کھڑا ہو بزم سے جب وہ قیامت پھر بپا کیوں ہو