اختر آزاد کی منتخب غزلیں اور نظمیں۔
کوئی چودھویں رات کا چاند بن کر تمہارے تصور میں آیا تو ہوگا (غزل)
کوئی چودھویں رات کا چاند بن کر تمہارے تصور میں آیا تو ہوگا
کسی سے تو کی ہوگی تم نے محبت کسی کو گلے سے لگایا تو ہوگا
لبوں سے محبت کا جادو جگا کے بھری بزم میں سب سے نظریں بچا کے
نگاہوں کے رستے سے دل میں سما کے کسی نے تمہیں بھی چرایا تو ہوگا
تمہارے خیالوں کی انگنائیوں میں مری یاد کے پھول مہکے تو ہوں گے
کبھی اپنی آنکھوں کے کاجل سے تم نے مرا نام لکھ کر مٹایا تو ہوگا
کبھی آئنے سے نگاہیں ملا کر جو لی ہوگی بھرپور انگڑائی تو نے
تو گھبرا کے خود تیری انگڑائیوں نے ترے حسن کو گدگدایا تو ہوگا
نگاہوں میں شمع تمنا جلا کر تکی ہوں گی تم نے بھی راہیں کسی کی
کسی نے تو وعدہ کیا ہوگا تم سے کسی نے تو تم کو رلایا تو ہوگا
جدا ہو گیا ہوگا جب کوئی تم سے دیا ہوگا جب تم کو دھوکا کسی نے
ہماری وفا یاد آئی تو ہوگی ہمیں اپنے نزدیک پایا تو ہوگا
حال دل سنانے میں عمر بیت جاتی ہے (غزل)
حال دل سنانے میں عمر بیت جاتی ہے
دل میں گھر بنانے میں عمر بیت جاتی ہے
یوں تو روز کہتے ہیں ان کو بھول جائیں گے
ہاں مگر بھلانے میں عمر بیت جاتی ہے
یوں تو مسکرانے کو روز مسکراتے ہیں
کھل کے مسکرانے میں عمر بیت جاتی ہے
زندگی ہمیشہ جب تیرگی کی زد میں ہو
شمع اک جلانے میں عمر بیت جاتی ہے
شوق جستجو میں ہم لا مکاں سے گزرے ہیں
خود کو آزمانے میں عمر بیت جاتی ہے
اس لئے نہیں کرتے ان سے کوئی وعدہ ہم
وعدے کے نبھانے میں عمر بیت جاتی ہے
موت زندگی میں کچھ فاصلہ نہیں لیکن
پھر بھی آنے جانے میں عمر بیت جاتی ہے
تنکا تنکا جوڑا ہے ہم نے رات دن اخترؔ
آشیاں سجانے میں عمر بیت جاتی ہے
تو مرا عشق ہے حقیقت ہے (نظم)
تو مرا عشق ہے حقیقت ہے
مجھ کو تجھ سے بڑی محبت ہے
ذکر تیرا ہے ہر فسانے میں
خود کو کھویا ہے تجھ کو پانے میں
حسن تیرا شباب تیرا ہے
اور رکھا ہے کیا زمانے میں
بن ترے زندگی ادھوری ہے
پیار تیرا بہت ضروری ہے
تو مری زندگی کی چاہت ہے
میری چاہت ہے جستجو تو ہے
میری حسرت ہے آرزو تو ہے
تو مری دھڑکنوں میں شامل ہے
میری نظروں کے روبرو تو ہے
تیری زلفوں میں کھو گیا ہوں میں
تیری آنکھوں کا ہو گیا ہوں میں
تو وفا کی حسین مورت ہے
میں ازل سے ترا تمنائی
تیرے جلوؤں کا میں ہوں شیدائی
سچ تو یہ ہے خدا کی جنت سے
میری قسمت تجھے چرا لائی
کون ہے تجھ سا مہ جمالوں میں
تو ہی تو ہے مرے خیالوں میں
تیرے آنکھوں میں میری جنت ہے