اختر امان کی منتخب غزلیں اور نظمیں۔
محبتوں میں بہت رس بھی ہے مٹھاس بھی ہے (غزل)
محبتوں میں بہت رس بھی ہے مٹھاس بھی ہے
ہمارے جینے کی بس اک یہی اساس بھی ہے
کبھی تو قرب سے بھی فاصلے نہیں مٹتے
گو ایک عمر سے وہ شخص میرے پاس بھی ہے
کسی کے آنے کا موسم کسی کے جانے کا
یہ دل کہ خوش بھی ہے لیکن بہت اداس بھی ہے
بدن کے شہر میں آباد اک درندہ ہے
اگرچہ دیکھنے میں کتنا خوش لباس بھی ہے
یہ جانتے ہیں کہ سب تھک کے گر پڑیں گے کہیں
شکستہ لوگوں میں جینے کی کتنی آس بھی ہے
وہ اس کا اپنا ہی انداز ہے بیاں کا امانؔ
ہر ایک حکم پہ کہتا ہے التماس بھی ہے
یہاں موسم بھی بدلیں تو نظارے ایک جیسے ہیں (غزل)
یہاں موسم بھی بدلیں تو نظارے ایک جیسے ہیں
ہمارے روز و شب سارے کے سارے ایک جیسے ہیں
ہمیں ہر آنے والا زخم تازہ دے کے جاتا ہے
ہمارے چاند سورج اور ستارے ایک جیسے ہیں
خدایا تیرے دم سے اپنا گھر اب تک سلامت ہے
وگرنہ دوست اور دشمن ہمارے ایک جیسے ہیں
کہیں گر فرق نکلے گا تو بس شدت کا کچھ ورنہ
یہاں پر غم ہمارے اور تمہارے ایک جیسے ہیں
میں کس امید پہ دامن کسی کا تھام لوں اخترؔ
کہ سب سے دوستی میں اب خسارے ایک جیسے ہیں
میرے خوابوں کی تعبیر سے بھی حسیں (نظم)
میرے خوابوں کی تعبیر سے بھی حسیں
میرے آبا و اجداد کی سر زمیں
مجھ کو ایسے لگا
جیسے میں تیرا بیٹا نہیں
وہ عمارات جو تیری عظمت کی اک زندہ
تصویر تھیں
اب کھنڈر بن چکیں
ہر طرف خامشی اور مکڑی کے جالے
ہر اک شے پہ برسوں سے کائی کی تہہ جم چکی ہے
عجب ایک پر ہوں سا یہ سماں ہے
کہیں پر نہ اب ہیں نشان پاؤں کے
جہاں سے کئی قافلے منزلیں مارتے
نئے دور کے جو پیامی بنے تھے
مگر اب وہ رستے
زمانے کی اڑتی ہوئی گرد میں دب چکے ہیں
نہ اب یہ فضا
ان کے گھوڑوں کی ٹاپوں سے ہی گونجتی ہے
صدائیں
خلاؤں کے اندھے کنوئیں میں
کہیں گم ہوئی ہیں
کہ جیسے مرا اب کسی شے سے بھی کوئی رشتہ نہیں ہے
میں ان کے لئے اجنبی ہوں
وہ میرے لئے اجنبی ہیں
میں فقط حال کے ایک بجرے میں بیٹھا
سمندر کی لہروں
ہواؤں کی سمتوں کے رحم و کرم پر
فضاؤں میں گویا معلق ہوا ہوں
کہیں دور تک پاؤں دھرنے کی خاطر زمیں ہی نہیں ہے
عجب زندگی ہے
اگرچہ ہوں زندہ
مگر زندہ رہنے کی خواہش نہیں ہے
اے زمیں
مجھ پہ اپنے درخشندہ ماضی کے دروازے وا کر
مری خالی آنکھیں نئے خواب سے بھر
مجھے لذت حال سے آشنا کر