اکھلیش چندر پانڈے کی غزلیں — Akhilesh Chandra Pandey Ghazals

اکھلیش چندر پانڈے کی منتخب غزلیں اور نظمیں۔

ہمیں خود کو بچانا بھی نہیں ہے (غزل)

ہمیں خود کو بچانا بھی نہیں ہے

مگر یوں ہی مٹانا بھی نہیں ہے

نیا اپنا فسانہ بھی نہیں ہے

مگر اتنا پرانا بھی نہیں ہے

نہیں یادوں میں اس کی دل جلانا

مگر یکسر بھلانا بھی نہیں ہے

بھٹکنا تو نہیں ہے ہم کو لیکن

بنانا آشیانہ بھی نہیں ہے

نہیں کچھ لینا دینا زندگی سے

مگر اس کو گنوانا بھی نہیں ہے

خلاؤں میں ہمیں کھونا نہیں ہے (غزل)

خلاؤں میں ہمیں کھونا نہیں ہے

زمیں کا بھی مگر ہونا نہیں ہے

عجب احوال ہے امروز اپنا

بہت ہے غم مگر رونا نہیں ہے

بڑی دنیا ہے ہم بھی جانتے ہیں

مگر اپنا تو اک کونا نہیں ہے

ہمیں سے مانگتا ہے پھل زمانہ

ہمیں تو بیج ہی بونا نہیں ہے

کریں کیا جانور بیمار ہے پر

ہمارے ہاتھ کچھ ٹونا نہیں ہے

ہمارے فلسفے میں ہاں نہیں گر

تو ہونٹوں پر بھی اپنے نا نہیں ہے

چپ کھڑے درخت سے (نظم)

چپ کھڑے درخت سے

میرے شانے چھوتے ہوئے

خشک پتے گرتے ہیں

بے نور دھوپ اور بے رنگ موسم

رک رک کر چلتی ہوا

ہر شے اداس ہے

زمین آسمان منظر سب

بائیں جانب

کولتار کی

وہ سڑک ہے

جو سبز و سیاہ درختوں

کی قطار کے درمیان

دور تک

بل کھاتی

چلی گئی ہے

دائیں جانب

نواب کی پرانی حویلی

جس میں

اب مارکیٹ ہے

سامنے

فینس کے اس پار

اسکول کی عمارت

جس کے گیٹ پر

مالتی کی بیل کے زیر سایہ

ایک گیت ہے

گیت

جو ملنے اور بچھڑنے

رونے اور گانے

جینے اور غم اٹھانے

کے بارے میں ہے

جو فقط بچھڑنے کے لئے ملنے

فقط رونے کے لئے گانے

اور فقط غم اٹھانے کے لئے جینے

زندگی مسرتوں کا

کیسا بے رحم چھلاوا ہے

تاہم گلہ

کہ یہ اتنی مختصر ہے

اداس دوپہر

سونے پارک کی بد رنگ بنچ پر

کب سے بیٹھا ہوں

فضا میں ایک گیت کی

بازگشت سنتا ہوا

شاد

ناشاد