آرب ہاشمی کی غزلیں — Aarib Hashmi Ghazals

آرب ہاشمی کی منتخب غزلیں اور نظمیں۔

جب تھے کم عمر سمجھ دار نہیں ہوتے تھے (غزل)

جب تھے کم عمر سمجھ دار نہیں ہوتے تھے

ان دنوں لوگ اداکار نہیں ہوتے تھے

اب تو وہ لوگ بھی ملنے کو چلے آتے ہیں

بات کرنے کو جو تیار نہیں ہوتے تھے

کچھ گھروں میں کوئی رہتا ہی نہیں تھا افسوس

کچھ گھروں کے در و دیوار نہیں ہوتے تھے

بات کرنے میں کوئی خوف نہیں ہوتا تھا

لوگ یوں ملنے سے بیمار نہیں ہوتے تھے

اس طرح فتح کئے کتنے علاقے ہم نے

جنگ کے واسطے ہتھیار نہیں ہوتے تھے

یوں نہ ہو آنکھ کھلے اور بچھڑ جائیں ہم

بس اسی خوف سے بیدار نہیں ہوتے تھے

جن دنوں خواب لٹاتی تھیں یہ آنکھیں آربؔ

ان دنوں اتنے خریدار نہیں ہوتے تھے

تری مہک نے ہی تیرا پتہ دیا ہے مجھے (غزل)

تری مہک نے ہی تیرا پتہ دیا ہے مجھے

خدا کا شکر کہ تجھ سے ملا دیا ہے مجھے

میں ایک تیر تھا اس کی کماں میں رکھا ہوا

اور اس نے یوںہی ہوا میں چلا دیا ہے مجھے

کسی کی آنکھیں سجائی تھی میرے چہرے پر

کسی کا خواب تھا لیکن دکھا دیا ہے مجھے

ملا کے خاک سمندر کے کھارے پانی میں

گھما کے چاک اچانک بنا دیا ہے مجھے

عجیب عشق تھا جس نے نمود کرتے وقت

ہٹا دیا ہے جنوں اور بڑھا دیا ہے مجھے

شب فراق میں اس کو بھلا کے سویا تھا

پر اس نے خواب میں آ کر جگا دیا ہے مجھے

میں جانتا ہوں وہ میرے لیے بنا ہی نہیں

میں سوچتا ہوں محبت نے کیا دیا ہے مجھے

میری گرفت میں آتا نہیں بدن اس کا

یہ کس خیال کے پیچھے لگا دیا ہے مجھے

پھر اس کی آنکھ میں آنسو ہیں کس لئے آربؔ

وہ جس کو زعم تھا یکسر بھلا دیا ہے مجھے