کلام ۔ وصی شاہ کتاب ۔ تیری میری نشانیاں مجھے صندل …
کلام ۔ وصی شاہ
کتاب ۔ تیری میری نشانیاں
مجھے صندل کر دو
صفحہ ۔ ۱۹۱
گنگناتے ہوئے آنچل کی ہَوا دے مجھ کو
اُنگلیاں پھیر کے بالوں میں سلا دے مجھ کو
جس طرح فالتو گلدان پڑے رہتے ہیں
اپنے گھر کے کسی کونے سے لگا دے مجھ کو
یاد کرکے مجھے تکلیف ہی ہوتی ہوگی
ایک قصہ ہوں پُرانا سا بُھلا دے مجھ کو
ڈوبتے ڈوبتے آواز تری سُن جاوٓں
آخری بار تو ساحل سے صدا دے مجھ کو
مَیں ترے ہجر میں چُپ چاپ نہ مرجاوٓں کہیں
مَیں ہوں سکتے میں کبھی آ کے رُلا دے مجھ کو
دیکھ میں ہوگیا بدنام کتابوں کی طرح
میری تشہیر نہ کر اَب تو جلا دے مجھ کو
روٹھنا تیرا میری جان لئے جاتا ہے
ایسے ناراض نہ ہو ، ہنس کے دِکھا دے مجھ کو
اور کچھ بھی نہیں مانگا میرے مالک تجھ سے
اس کی گلیوں میں پڑی خاک بنا دے مجھ کو
لوگ کہتے ہیں کہ یہ عشق نگل جاتا ہے
میں بھی اس عشق میں آیا ہوں دُعا دے مجھ کو
یہی اوقات ہے میری تیرے جیون میں کہ میں
کوئی کمزور سا لمحہ ہوں ، بُھلا دے مجھ کو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔”””””””””