( غیر مطبُوعہ ) ہر گِز نہ راہ پائی ‘ فرداودی نے د…
( غیر مطبُوعہ )
ہر گِز نہ راہ پائی ‘ فرداودی نے دِل پر
رہتی ہے ایک حالت ‘ بارہ مہِینے ‘ دِل پر
سکتے میں ہیں مَہ و مِہر ‘ دریا پڑے ہیں بے بحر
ہے سخت غیر موزُوں ‘ دُنیا زمین ِ دِل پر
شُعلہ چراغ میں ہے ‘ سودا دماغ میں ہے
ثابت قدم ہُوں اب تک ‘ دِین ِ مُبین ِ دِل پر
لِکھ لو یہ میری رائے ‘ کیا کیا سِتم نہ ڈھائے
کل دِل پہ آدمی نے ‘ آج آدمی نے دِل پر
یہ رنج نا کشِیدہ ‘ یہ جیب نا دَرِیدہ
اَے عشق ! رحم ‘ ہاں رحم ‘ اِن تارکِین ِ دِل پر
پڑتا ہے جَستہ جَستہ ‘ مدّھم سا اُور شِکَستہ
اِک ماہ ِ نِیلمِیں کا ‘ پَرتَو نگِین ِ دِل پر
سَو بار اِدھر سے گُزرا ‘ وہ آتِشِیں بدن سا
اِک بَرگ ِ گُل نہ رکّھا ‘ دست ِ یَمین ِ دِل پر
ظوفان اُٹھا رکھا تھا ‘ آنکھوں نے واہ وا کا !
اُس کی نظر نہیں تھی ‘ کل آفرین ِ دِل پر
رنگِین تو بہُت ہے ‘ دُنیا مگر مہا شَے
دَھبّے سے پڑ گئے ہیں ‘ سب آستِین ِ دِل پر
وہ ماہ ِ نازنِیں ہے ‘ یا سَرو ِ آتِشِیں ہے
یا فِتنہ ء قیامت ‘ برپا زمین ِ دِل پر
سب نا ملامتوں کو ‘ سب بے کرامتوں کو
سب سَر سلامتوں کو ‘ لانا ہے دِین ِ دِل پر
جاوید کو دُکھا کر ‘ کہتا ہے سب سے دِل بَر
اُودھم مچا رکھا ہے ‘ اِس ” بھائی جی ” نے دِل پر
( احمد جاوید )
پَس ِ نوِشت : مندرج ِ بالا غزل کی شعری زمین در حقیقت شمس الرّحمٰن فاروقی کی ہے ‘ جس میں احمد مشتاق نے بھی ایک غزل کہی ۔ احمد جاوید فی زماننا مذہبیات ‘ روحانیات ‘ ادبیات ‘ سائنسیات ‘ فلسفہ ‘ اور دیگر کئی علُوم و فنون پر عالِمانہ دست گاہ رکھتے ہیں اور عُمدہ شاعر بھی ہیں ۔
( سُنہری حلقہ )