( غیر مطبوعہ ) نگاہ سے نہیں ہٹتے ‘ تِرے دَر و دیو…
( غیر مطبوعہ )
نگاہ سے نہیں ہٹتے ‘ تِرے دَر و دیوار
یہ میرے ساتھ کہاں چل پڑے ‘ دَر و دیوار
نہ مُنہہ سے بول سکیں کچھ ‘ نہ سَر سے بول سکیں
ہمیں گواہ بھی کیسے مِلے ‘ دَر و دیوار
پھر اُس دیار ِ محبّت میں جا کے لَوٹ آئے
نہ تھے مکین ‘ تو کیا دیکھتے دَر و دیوار
زمیں لرَزنے لگی ‘ روشنی سے ٹکرا کر
ستارہ آ کے گِرا ‘ بَج اُٹھے دَر و دیوار !
کہاں سے مِل گئی انجام کی خبر اُن کو
کہ رہ گئے ہیں کھڑے کے کھڑے ‘ دَر و دیوار
اُسی کی لَو سے فروزاں تھے خدّ و خال اِن کے
بُجھا چراغ ‘ تو گُل ہو گئے دَر و دیوار
( خُورشید رِضوی )