زباں خاموش ,دل میں جوش طوفاں لے کے آیا ہوں بھڑکتی…
زباں خاموش ,دل میں جوش طوفاں لے کے آیا ہوں
بھڑکتی آتش غم , زیر داماں لے کے آیا ہوں
چمن سے لوگ گلہاۓ تمنا لے کے آتے ہیں
مگر میں ہوں کہ خالی جیب و داماں لے کے آیا ہوں
ذرا دیکھوں تو کب تک , شمع میرا ساتھ دیتی ھے
کہ میں بھی انجمن میں سوز پنہاں لے کے آیا ہوں
بڑے آرام سے اب بے کسی میں , نیند آۓ گی
وطن سے چادر شام غریباں لے کے آیا ہوں
تری تیغ ستم کی داستاں , اب اور چمکے گی
جبیں پہ سرخی ء خون شہیداں لے کے آیا ہوں
کلیم عاجز