ایک زمین استاد قمرؔ جلالوی فیض احمد فیضؔ سیّد مبار…
ایک زمین
استاد قمرؔ جلالوی
فیض احمد فیضؔ
سیّد مبارک شاہ
۔۔۔۔۔
استاد قمرؔ
کِس یاس سے مَرے ہیں مرِیض اِنتِظار کے
قاتِل کو یاد کر کے قضا کو پُکار کے
مَقتَل میں حال پُوچھو نہ مُجھ بے قرار کے
تُم اپنے گھر کو جاؤ چُھری پھیر پھار کے
رُکتی نہیں ہے گرِدشِ ایّام کی ہنسی
لے آنا طاق سے مِرا ساغر اُتار کے
جی ہاں شراب خور ہیں ہم تو جنابِ شیخ
بندے بس ایک آپ ہیں پَروَردِگار کے
لِکھّا ہُوا جہاں تھا مُقدَّر میں ڈُوبنا
کشتی کو مَوج لائی وہِیں گھیر گھار کے
صیّاد تیرے حُکمِ رہائی کا شُکرِیَہ
ہم تو قَفَس میں کاٹ چُکے دِن بہار کے
ہم اُن سےبات کر نہ سکے بزمِ غیر میں
شَوقِ کلام رہ گیا دِل مار مار کے
بِجلی کبھی گِری کبھی صیّاد آگیا
ہم نے تو چار دِن بھی نہ دیکھے بہار کے
کِتنی طوِیل ہوتی ہے اِنساں کی زِندَگی
سمجھا ہُوں آج میں شبِ فُرقت گُزار کے
میّت قمرؔ کی دیکھ کے بولے وہ صُبحِ ہِجر
تارے گِنے گئے نہ شبِ اِنتِظار کے۔۔۔!
۔۔۔۔۔
فیضؔ
کِس یاس سے مَرے ہیں مرِیض اِنتِظار کے
قاتِل کو یاد کر کے قضا کو پُکار کے۔۔۔!
دونوں جہان تیری محَبّت میں ہار کے
وہ جا رہا ہے کوئی شبِ غم گُزار کے
ویراں ہے مے کدہ خُم و ساغر اُداس ہیں
تُم کیا گئے کہ رُوٹھ گئے دِن بہار کے
اِک فُرصَتِ گُناہ مِلی وہ بھی چار دِن
دیکھے ہیں ہم نے حوصلے پَروَردِگار کے
دُنیا نے تیری یاد سے بیگانہ کر دیا
تُجھ سے بھی دِل فریب ہیں غَم روزگار کے
بُھولے سے مُسکُرا تو دیے تھے وہ آج فیضؔ
مَت پُوچھ وَلوَلے دِلِ ناکَردَہ کار کے۔۔۔!
۔۔۔۔۔
تضمین در شعرِ یاسمین و بر سر زمینِ فیض از سیّد مبارک شاہ
اپنے ہر ایک سانس میں صدیاں گُزار کے
بیٹھے ہیں کِس کی راہ میں موسم بہار کے
اِک لَمحہِ حیات بھی اِس بوجھ میں نہ تھا
دیکھا جو سَر سے عُمَر کی گٹھڑی اُتار کے
کِرنوں کی آبشار بھی گدلی ہے کِس قدر
چِھینٹے ہَوا کے مُنہ پہ ہیں گرد و غُبار کے
دِن کو مِری نِگاہ میں شَب جاگتی رہے
سوتا ہُوں اپنی آنکھ میں سُورَج اُتار کے
اِک تِیسرے جہان کی مُجھ کو تلاش ہے
”دونوں جہان تیری محبّت میں ہار کے“
دِل میں خیالِ سُود سے خوفِ زِیاں رہا
مَیں صَرف بھی نہ کر سکا لَمحے اُدھار کے
قُربِ زمیں کی آنچ کو مَحسُوس تو کرے
سُورَج خلا میں پھینک دے شُعلے اُتار کے
اپنا ثبات خاک کے پیکر میں رکھ دیا
دیکھے تو کوئ حوصلے پَروَردِگار کے
”نغمے تراشنے کا ہُنر اُس سے سِیکھیے
جو جی رہا ہو رُوح میں چِیخیں اُتار کے“۔۔۔!