امیر مینائی ۔۔۔۔۔۔۔۔۔۔۔۔۔۔ آج 13، اکتوبر کلاسکل ار…

امیر مینائی ۔۔۔۔۔۔۔۔۔۔۔۔۔۔
آج 13، اکتوبر کلاسکل اردو ادب کے نامور استاد شاعر اور داغ دہلوی کے ھم عصر امیر مینائی کا 114 واں یومِ وفات ھے ۔
تاریخ پیدائش : 21 فروری 1828ء
تاریخ وفات : 13 اکتوبر 1900ء
امیر احمد نام مولوی کرم محمد کے بیٹے اور مخدوم شاہ مینا کے خاندان سے تھے۔ لکھنو میں 21 فروری 1828ء میں پیداہوئے درسی کتب مفتی سعد اللہ اور ان کے ہمعصر علمائے فرنگی محل سے پڑھیں۔ خاندان صابریہ چشتیہ کے سجادہ نشین حضرت امیر شاہ سے بیعت تھی۔ شاعری میں اسیر لکھنوی کے شاگرد ہوئے ۔ 1852ء میں نواب واجد علی شاہ کے دربار میں رسائی ہوئی اور حسب الحکم دو کتابیں شاد سلطان اور ہدایت السلطان تصنیف کیں۔ 1857ء کے بعد نواب یوسف علی خاں کی دعوت پر رامپور گئے۔ ان کے فرزند نواب کلب علی خاں نے اُن کو اپنا استاد بنایا۔ نواب صاحب کے انتقال کے بعد رامپور چھوڑنا پڑا۔ 1900 میں حیدرآباد گئے وہاں کچھ دن قیام کیا تھا۔ کہ بیمار ہوگئے۔ اور وہیں 13 ، اکتوبر 1900ء میں انتقال ھوا ۔
متعدد کتابوں کے مصنف تھے ۔ ایک دیوان غیرت بہارستان ، 1857ء کے ہنگامے میں ضائع ہوا۔ موجودہ تصانیف میں دو عاشقانہ دیوان مراۃ الغیب ، صنم خانہ عشق اور ایک نعتیہ دیوان محمد خاتم النبین ہے۔ دو مثنویاں نور تجلی اور ابرکرم ہیں۔ ذکرشاہ انبیا بصورت مسدس مولود شریف ہے۔ صبح ازل آنحضرت کی ولادت اور شام ابد وفات کے بیان میں ہے۔ چھ واسوختوں کاایک مجموعہ بھی ہے۔ نثری تصانیف میں انتخاب یادگار شعرائے رامپور کا تذکرہ ہے، جو نواب کلب علی خان کے ایما پر 1890ء میں لکھا گیا۔ لغات کی تین کتابیں ہیں۔ سرمہ بصیرت ان فارسی عربی الفاظ کی فرہنگ ہے جو اردو میں غلط مستعمل ہیں۔ بہار ہند ایک مختصر نعت ہے۔ سب سے بڑا کارنامہ امیر اللغات ہے اس کی دو جلدیں الف ممدودہ و الف مقصورہ تک تیار ہو کر طبع ہوئی تھیں کہ انتقال ہوگیا۔
٭٭٭٭٭٭٭٭٭٭٭٭
منتخب کلام
۔۔۔۔۔۔۔۔۔۔۔
یہ سب ظہورِ شانِ حقیقت بشر میں ہے
جو کچھ نہاں تھا تخم میں، پیدا شجر میں ہے
ہر دم جو خونِ تازہ مری چشمِ تر میں ہے
ناسور دل میں ہے کہ الٰہی جگر میں ہے
کھٹکا رقیب کا نہیں، آغوش میں ہے یار
اس پر بھی اک کھٹک سی ہمارے جگر میں ہے
واصل سمجھیے اس کو جو سالک ہے عشق میں
منزل پہ جانیے اسے جو رہگزر میں ہے
آنکھوں کے نیچے پھِرتی ہے تصویر یار کی
پُتلی سی اک بندھی ہوئی تارِ نظر میں ہے
کرتے ہیں اس طریق سے طے ہم رہِ سلوک
سر اس کے آستاں پہ، قدم رہگزر میں ہے
پہلو میں میرے دل کو نہ، اے درد! کر تلاش
مدت ہوئی تباہی کا مارا سفر میں ہے
تُلسی کی کیا بہار ہے دندانِ یار پر
سوسن کا پھول چشمۂ آبِ گہر میں ہے
ہو دردِ عشق ایک جگہ تو دوا کروں
دل میں، جگر میں، سینے میں، پہلو میں، سر میں ہے
صیّاد سے سوال رہائی کا کیا کروں
اُڑنے کا حوصلہ ہی نہیں بال و پر میں ہے
قاصد کو ہاتھ داغ کے بھیجا ہے یار نے
خاکی نئی رسید کفِ نامہ بر میں ہے
تیرِ قضا کو ناز ہے کیا اپنے توڑ پر
اتنا اثر تو یار کی سیدھی نظر میں ہے
تم جاؤ تیغ باندھ کے پھر سیر دیکھ لو
میرے گلے پہ ہے کہ تمھاری کمر میں ہے
ساقی مئے طہور میں کیفیّتیں سہی
پر وہ مزا کہاں ہے جو تیری نظر میں ہے
خنجر چلے کسی پہ تڑپتے ہیں ہم امیر
سارے جہاں کا درد ہمارے جگر میں ہے
۔۔۔۔۔۔۔۔۔۔۔۔۔۔۔۔۔۔
ہوئے نامور بے نشاں کیسے کیسے
زمیں کھا گئی آسماں کیسے کیسے
تری بانکی چتون نے چن چن کے مارے
نکیلے سجیلے جواں کیسے کیسے
نہ گل ہیں نہ غنچے نو بوٹے نہ پتے
ہوئے باغ نذرِ خزاں کیسے کیسے
یہاں درد سے ہاتھ سینے پہ رکھا
وہاں ان کو گزرے گماں کیسے کیسے
ہزاروں برس کی ہے بڑھیا یہ دنیا
مگر تاکتی ہے جواں کیسے کیسے
ترے جاں نثاروں کے تیور وہی ہیں
گلے پر ہیں خنجر رواں کیسے کیسے
جوانی کا صدقہ ذرا آنکھ اٹھاؤ
تڑپتے ہیں دیکھو جواں کیسے کیسے
خزاں لوٹ ہی لے گئی باغ سارا
تڑپتے رہے باغباں کیسے کیسے
امیرؔ اب سخن کی بڑی قدر ہو گی
پھلے پھولیں گے نکتہ داں کیسے کیسے
۔۔۔۔۔۔۔۔۔۔۔۔۔۔۔۔۔۔۔۔
سرکتی جائے ہے رُخ سے نقاب آہستہ آہستہ
نکلتا آ رہا ہے آفتاب آہستہ آہستہ
جواں ہونے لگے جب وہ تو ہم سے کر لیا پردہ
حیا یک لخت آئی اور شباب آہستہ آہستہ
شبِ فرقت کا جاگا ہوں فرشتو اب تو سونے دو
کہیں فرصت میں کر لینا حساب آہستہ آہستہ
سوالِ وصل پر ان کو خدا کا خوف ہے اتنا
دبے ہونٹوں سے دیتے ہیں جواب آہستہ آہستہ
ہمارے اور تمہارے پیار میں بس فرق ہے اتنا
اِدھر تو جلدی جلدی ہے اُدھر آہستہ آہستہ
وہ بے دردی سے سر کاٹے امیر اور میں کہوں ان سے
حضور آہستہ آہستہ جناب آہستہ آہستہ
۔۔۔۔۔۔۔۔۔۔۔۔۔۔۔۔۔۔۔
امیر مینائی کے ضرب المثل اشعار
……….
آھوں سے سوزِ عشق مٹایا نہ جائے گا
پھونکوں سے یہ چراغ بجھایا نہ جائے گا
۔۔۔۔۔۔۔۔۔۔۔
اچھے عیسیٰ ھو مریضوں کا خیال اچھا ھے
ھم مرے جاتے ھیں تم کہتے ھو حال اچھا ھے
۔۔۔۔۔۔۔۔۔۔۔۔
امیر اب ھچکیاں آ نے لگی ھیں
کہیں میں یاد فرمایا گیا ھوں
۔۔۔۔۔۔۔۔۔۔۔۔۔۔
گاھے گاھے کی ملاقات ھی اچھی ھے امیر
قدر کھو دیتا ھے ھر روز کا آنا جانا
۔۔۔۔۔۔۔۔۔۔۔۔۔۔۔
ھوئے نامور بے نشاں کیسے کیسے
زمیں کھا گئی آسماں کیسے کیسے
۔۔۔۔۔۔۔۔۔۔۔۔۔۔
کون سئ جا ھے جہاں جلوہ معشوق نہیں
شوق دیدار اگر ھے تو نظر پیدا کر
۔۔۔۔۔۔۔۔۔۔۔۔۔۔
لطف آنے لگا جفاؤں میں
وہ کہیں مہرباں نہ ھو جائے
۔۔۔۔۔۔۔۔۔۔۔۔۔۔
قریب ھے یارو روزِ محشر ۔ چھپے گا کشتوں کا خون کیونکر
جو چپ رھے گی زبانِ خنجر ، لہو پکارے گا آستین کا
۔۔۔۔۔۔۔۔۔۔۔۔
شاعر کو مست کرتی ھے تعریفِ شعر امیر
سو بوتلوں کا نشہ ھے اس واہ واہ میں
۔۔۔۔۔۔۔۔۔۔۔۔۔
تیر کھانے کی ھوس ھے تو جگر پیدا کر
سرفروشی کی تمنا ھے تو سر پیدا کر
۔۔۔۔۔۔۔۔۔۔۔۔۔۔
تیر پہ تیر لگاؤ تمہین ڈر کس کا ھے
سینہ کس کا ھے مری جان جگر کس کا ھے
۔۔۔۔۔۔۔۔۔۔۔۔۔۔۔
تجھ سے مانگوں میں تجھی کو کہ سبھی کچھ مل جائے
سو سوالون سے یہی ایک سوال اچھا ھے
۔۔۔۔۔۔۔۔۔۔۔۔۔۔
تجھ کو آتا ھے پیار پر غصہ
مجھ کو غصے پہ پیار آتا ھے
۔۔۔۔۔۔۔۔۔۔۔۔۔۔۔
وصل ھو جائے یہیں حشر میں کیا رکھا ھے
آج کی بات کو کیوں کل پہ اٹھا رکھا ھے
۔۔۔۔۔۔۔۔۔۔۔۔۔۔۔۔۔۔
وصل کا دن اور اتنا مختصر
دن گنے جاتے تھے اس دن کے لئے
۔۔۔۔۔۔۔۔۔۔۔۔۔۔۔۔۔۔۔
زیست کا اعتبار کیا ھے امیر
آدمی بلبلہ ھے پانی کا
۔۔۔۔۔۔۔۔۔۔۔۔۔۔۔۔۔۔۔