راج کمار قیس کی منتخب غزلیں اور نظمیں۔
حصار ذات سے نکلوں تو تجھ سے بات کروں (غزل)
حصار ذات سے نکلوں تو تجھ سے بات کروں
تری صفات کو سمجھوں تو تجھ سے بات کروں
تو کوہسار میں وادی میں دشت و صحرا میں
میں تجھ کو ڈھونڈ نکالوں تو تجھ سے بات کروں
تو شاخ شاخ پہ بیٹھا ہے پھول کی صورت
میں خار خار سے الجھوں تو تجھ سے بات کروں
ترے اشاروں سے بڑھ کر ترا بیاں مبہم
میں تیری بات کو سمجھوں تو تجھ سے بات کروں
تو اتنا دور کہ پہچاننا بھی مشکل ہے
تجھے قریب سے دیکھوں تو تجھ سے بات کروں
جھجک جھجک کے اگر ہو تو بات بات نہیں
میں تیری آنکھ میں جھانکوں تو تجھ سے بات کروں
تو میرا دوست ہے دشمن ہے یا کہ کچھ بھی نہیں
میں تیرے دل کو ٹٹولوں تو تجھ سے بات کروں
یہ موج موج تلاطم پہ ڈوبنا میرا
میں اتفاق سے ابھروں تو تجھ سے بات کروں
زبان قیسؔ پہ ہر وقت تیری باتیں ہیں
زبان قیس جو سیکھوں تو تجھ سے بات کروں
دعا نے کام کیا ہے یقیں نہیں آتا (غزل)
دعا نے کام کیا ہے یقیں نہیں آتا
وہ میرے پاس کھڑا ہے یقیں نہیں آتا
میں جس مقام پر آ کر رکا ہوں شام ڈھلے
وہیں پہ وہ بھی رکا ہے یقیں نہیں آتا
وہ جس کی آنکھ میں دونوں جہاں دکھائی پڑیں
وہ مجھ کو دیکھ رہا ہے یقیں نہیں آتا
جسے صنم کبھی سمجھا کبھی خدا جانا
وہ ایسا ہوش ربا ہے یقیں نہیں آتا
جو سوز بن کے سمایا تھا میرے شعروں میں
وہ ساز بن کے اٹھا ہے یقیں نہیں آتا
شگفتہ چہرہ اور اس پر تپاں تپاں عارض
کوئی انار چھٹا ہے یقیں نہیں آتا
زہے نصیب کہ لو دے اٹھی ہے تاریکی
سکوت بول پڑا ہے یقیں نہیں آتا
حریم ناز کو دیکھو کہ آج پہلی بار
در نیاز کھلا ہے یقیں نہیں آتا
یہ کیسے پچھلے دنوں چپ سی لگ گئی تھی جسے
پھر آج نغمہ سرا ہے یقیں نہیں آتا