مقصود وفا کی منتخب غزلیں اور نظمیں۔
تمہارے ہجر کا انجام خوب صورت ہے (غزل)
تمہارے ہجر کا انجام خوب صورت ہے
بہت اداس مگر شام خوب صورت ہے
پھر اس کے بعد یہ رستہ کدھر کو جاتا ہے
یہ زندگی تو کوئی گام خوب صورت ہے
تو جس طرح سے حسیں ہے زمانے بھر سے الگ
اسی طرح سے ترا نام خوب صورت ہے
نہیں ضروری کہ ہر بات کی وضاحت ہو
کہیں کہیں پہ یہ ابہام خوب صورت ہے
میں اس لیے نہیں دیتا صفائی اپنی وفاؔ
مرے حریف کا الزام خوب صورت ہے
تجھ سے اب درد کا رشتہ بھی نہیں چاہئے ہے (غزل)
تجھ سے اب درد کا رشتہ بھی نہیں چاہئے ہے
جا مجھے تیری تمنا بھی نہیں چاہئے ہے
دیکھ کچھ بھی نہ سکوں میں کسی سائے کے سوا
روشنی اتنی زیادہ بھی نہیں چاہئے ہے
اک نظر تشنۂ نظارہ ہی رکھ لینی ہے
اک تماشے میں تماشا بھی نہیں چاہئے ہے
خیر و شر دونوں مجھے زخم دئیے جاتے ہیں
یہ برا کیا مجھے اچھا بھی نہیں چاہئے ہے
اب ذرا چاہئے تنہائی میں یکسوئی مجھے
اب کوئی چاہنے والا بھی نہیں چاہئے ہے
میں نے ہلکان کیا جس کی طلب میں خود کو
سچ تو یہ ہے کہ وہ دنیا بھی نہیں چاہئے ہے
روک مت مجھ کو فرستادۂ طغیانی ہوں
اس سفر میں ہوں کہ رستہ بھی نہیں چاہئے ہے
جینا مشکل تو بہت ہے تری اس دنیا میں
لیکن اس خواب کو مرنا بھی نہیں چاہئے ہے
شاہوں کو خبر نہیں ہو سکی (نظم)
شاہوں کو خبر نہیں ہو سکی
کہ بلڈوزروں سے ہٹائی گئی میتوں کی ڈھیر میں
کس کس کے احرام پر لہو نے آیتیں رقم کیں
حاجیوں کی جمع پونجی سے منافع بٹورتی حکومتیں
آب زم زم کے چشمے اور پٹرول کے کنویں میں
تمیز کرنا بھول جائیں
تو خون کی لکیر حرم سے نکل کر منا تک پہنچ جاتی ہے
شاہی فرمان کو عبادت کا درجہ دینے والے
مفتیوں نے یہ کبھی نہیں دیکھا
کہ تاریخ کئی بار تخت کو تختہ بنتے ہوئے دیکھ چکی ہے
شیطان کو پتھر مارتا ہوا ہجوم
اپنے آپ کو روند کر خاک میں مل جاتا ہے
اور منصور انا الحق کہہ کر ہر دور میں امر ہوتا رہا
خدا
ندامت کے آنسو رونے والوں کو
معاف کرنے میں دیر نہیں کرتا
اور شیطان انتقام لینا نہیں بھولتا
لیکن ہم بھول جاتے ہیں
کہ محراب مسجد کے ہوں یا ماتھوں کے
نیکیوں اور بدیوں کا حساب صرف خدا کے پاس ہے
گن گن کر پتھر مارنے والے
ان کنکروں کی گنتی بھول چکے ہیں
جو ابابیلوں نے ہاتھیوں پر گرائے تھے