امام اعظم کی منتخب غزلیں اور نظمیں۔
جانے والے اتنا بتا دو پھر تم کب تک آؤ گے (غزل)
جانے والے اتنا بتا دو پھر تم کب تک آؤ گے
پھول بھی اب مرجھانے لگے ہیں، بولو کب اپناؤ گے
دل کے اس البم میں تو اب بس تصویر تمہاری ہے
من مندر کے دوار پہ اپنے تم بھی کچھ لٹکاؤ گے
رات کی تنہائی میں جب بھی یاد ہماری آئے گی
نیند تمہاری اڑ جائے گی اور بہت گھبراؤگے
پیروں کی زنجیریں کاٹو اور ہمت سے کام بھی لو
ورنہ قید میں رہ کر یوں ہی جیون بھر پچھتاؤ گے
دنیا کی اک ریت پرانی، ملنا اور بچھڑنا ہے
ایک زمانہ بیت گیا ہے تم کب ملنے آؤ گے
اب نہیں آتا ہے سندیسہ کوئی تمہاری نگری سے
کس کو تھا معلوم کہ تم بیگانے سے ہو جاؤ گے
پھولوں کے دن بیت نہ جائیں آؤ آؤ آ بھی جاؤ
کب تک جھوٹے وعدوں سے تم اعظمؔ کو بہلاؤ گے
گیسو و رخسار کی باتیں کریں (غزل)
گیسو و رخسار کی باتیں کریں
آؤ مل کر پیار کی باتیں کریں
بے وفائی جس کا ہے طرز عمل
بس اسی دل دار کی باتیں کریں
آج کل پیدل سفر دشوار ہے
خوب صورت کار کی باتیں کریں
لے کے نکلیں اک موبائل ہاتھ میں
اب تو بس بے تار کی باتیں کریں
جب سمجھ میں کچھ نہ آئے آپ کو
بیٹھ کر بیکار کی باتیں کریں
بات کانٹوں کی طرح جس کی چبھے
کیوں اسی گلنار کی باتیں کریں
صلح پر جب دونوں آمادہ ہوئے
پھر یہ کیوں تلوار کی باتیں کریں
جو یہاں دعویٰ بڑے وعدے کرے
بس اسی سرکار کی باتیں کریں
کیوں ہو اعظمؔ ایک محبوبہ کی بات
اور بھی دو چار کی باتیں کریں
زندگی کے کئی معیار ہیں (نظم)
زندگی کے کئی معیار ہیں
ورق ورق
اک رخ احساس کو
فطری اور مصنوعی سطح پر بانٹنا
اپنے اور پرائے کو
دو دائروں میں تقسیم کرنا
یا بارود کے دھماکوں میں
زمین کو ٹکڑے ٹکڑے کرنا
زندگی برائے زندگی کو ماننے والے
وقت کا کہرا چھٹتے ہی
آستھا کے عکس پھیلا دیتے ہیں
پاگل خیال کی شدت گھٹ جاتی ہے
اس پل شاخ در شاخ
پھیلنے والی خوشبو
کسی اجنبی کلائی پر
ایک راکھی باندھ دیتی ہے
پل بھر میں کڑوی سچائیاں
رشتوں کی تمام حدیں توڑ کر
بھائی بہن کے رشتے میں بدل جاتی ہیں
ذہن میں موجود تمام تلخیاں
خوش نما احساس میں
خود بخود ڈھل جاتی ہیں
امام اعظمؔ کی دعا ہے
بے مثال رشتے کا یہ بندھن
سدا قائم رہے