پیر • 5 اکتوبر 2026ء
📚 کتب خانہ ۱۴۸٬۸۹۴

فخرالدین فخری اورنگ آبادی کی غزلیں — Fakhruddin Fakhri Aurangabadi Ghazals

فخرالدین فخری اورنگ آبادی کی منتخب غزلیں اور نظمیں۔

جب سوں مجہہ دل کا نصیبہ عشق ہے تقدیر سوں (غزل)

جب سوں مجہہ دل کا نصیبہ عشق ہے تقدیر سوں

ہر نفس ہے شعلہ زن تجھ شوق کی تاثیر سوں

ابر نیئں تیری ہوا میں اے بہارستان حسن

آسماں میں دود ہے مجھ آہ کے توفیر سوں

برگ گل پر ہر سحر شبنم نہیں اے گلعذار

آسمان ہے زار میرے نالۂ شبگیر سوں

یک بیک دل عشق میں پیدا کیا دیوانگی

پائے بندی نیں اسے جز زلف کی زنجیر سوں

جیب جاں صد چاک ہے تجھ شوق میں اے گلبدن

کیا چلے اب پنجۂ عشق گریباں گیر سوں

ناز کے خنجر کا بسمل ہوں تغافل مت کرو

جان جاتا ہے مرا اک آن کی تاخیر سوں

آرزو بندی کے لکھنے میں قلم ہے سینہ چاک

شوق کا قصہ مبرا بس کہ ہے تحریر سوں

فخرؔ دین اب یار پر قربان کرتوں ننگ و نام

عشق کے فارغ کیا تجھ عقل کی تدبیر سوں