عظمت اللہ خاں کی منتخب غزلیں اور نظمیں۔
گرچہ کچھ رنگ اس کا کالا ہے (غزل)
گرچہ کچھ رنگ اس کا کالا ہے
میرا محبوب ہے نرالا ہے
تجھ کو ملتا ہے خوب وائٹ میٹ
تیری آنکھوں میں جو اجالا ہے
جو اکڑتا مثال سرو رہے
ایسے افسر کا بول بالا ہے
جس کو رشوت کی رہ گزر کہیے
ہم نے وہ راستہ نکالا ہے
چیونٹیوں کی طرح ہیں چمٹی ہوئی
تیری یادوں نے مار ڈالا ہے
تم جو بیٹھی ہو ساس کے نزدیک
زلزلہ کوئی آنے والا ہے
چھپ کے اپنی بہن سے مل جائے
میرا عظمت وہی تو سالا ہے
توقیر اعتبار وفا اور بڑھ گئی (غزل)
توقیر اعتبار وفا اور بڑھ گئی
لطف و کرم کے ساتھ سزا اور بڑھ گئی
دل بے نیاز چارۂ آزار ہو گیا
کچھ آرزوئے تیغ جفا اور بڑھ گئی
جب بھی ہوئے ہیں جادہ و منزل کے تذکرے
دیوانگیٔ اہل وفا اور بڑھ گئی
یہ التفات ناز بہت خوب ہے مگر
دل کہہ رہا ہے تیری جفا اور بڑھ گئی
دیکھا ہے بار بار کہ فصل بہار میں
ویرانیٔ چمن کی فضا اور بڑھ گئی
اے انتظار صبح طرب تیری آبرو
غم کے طفیل نام خدا اور بڑھ گئی
محبوب سا خیال کسی کا جب آ گیا
امید کے افق کی ضیا اور بڑھ گئی
اکثر تری عنایت پیہم کے باوجود
محسوس یہ ہوا کہ جفا اور بڑھ گئی
عظمتؔ کسی کے درد کا آیا ہے جب پیام
کچھ روشنیٔ فکر رسا اور بڑھ گئی
وہ چین کہاں اپنے گھر کا وہ بات کہاں اپنے گھر کی پیارا پیارا گھر اپنا (نظم)
وہ چین کہاں اپنے گھر کا وہ بات کہاں اپنے گھر کی پیارا پیارا گھر اپنا
وہ راج کہاں اپنے گھر کا وہ رات کہاں اپنی گھر کی آنکھوں کا تارا گھر اپنا
سکھ چین اگر دنیا میں ہے اپنے ہی گھر میں ملتا ہے سکھ کا سہارا گھر اپنا
دکھ درد کی گر کوئی دوا ہی اپنے ہی گھر کی سوا ہے دکھ کا مداوا گھر اپنا
وہ گھر والی سندر چترا گھر کی سیوا کرنے والی دل کا دلاسا گھر اپنا
آرام ہمیں دینے والی آپ مصیبت بھرنے والی جان سے پیارا گھر اپنا
آنکھوں کے تارے لاڈلے گھر کے سب مل کر گھر سر پہ اٹھاتے دودھوں نہایا گھر اپنا
ہنستے ہنساتے روٹھتے منتے سنتے کہانی سوتے سلاتے بسا بسایا گھر اپنا
ہم پر جان چھڑکنے والا وہ پروان چڑھانے والا پالنے والا گھر اپنا
وہ بلوان بنانے والا وہ انسان بنانے والا ڈھالنے والا گھر اپنا
وہ پاک ہوا اپنے گھر کی پیار کی جلا اپنے گھر کی دل میں سمایا گھر اپنا
ایثار وفا اپنے گھر کا وہ درد دیا اپنے گھر کی روح پہ چھایا گھر اپنا
جڑ بنیاد وطن کی گھر ہے وطن گھروں کا اپنے گھر ہے اپنے گھروں کا گھر اپنا
اپنے گھر پہ نثار وطن ہے اور وطن کے صدقے گھر ہے وطن کا شیدا گھر اپنا
وطن کی چاہت اپنے گھر سے وطن کی طاقت اپنے گھر سے وطن کا پیارا گھر اپنا
وطن کی دولت اپنے گھر سے وطن کی عزت اپنے گھر سے راج دلارا گھر اپنا