عظمت عبدالقیوم خاں کی منتخب غزلیں اور نظمیں۔
درد دل کیف الم سوز جگر سے پہلے (غزل)
درد دل کیف الم سوز جگر سے پہلے
زندگی کچھ بھی نہ تھی تیری نظر سے پہلے
فکر فردا غم امروز روایات کہن
کتنی راہیں ہیں تری راہ گزر سے پہلے
جن اجالوں کو زمانے کی سحر ہونا ہے
وہ گزرتے ہیں مری فکر و نظر سے پہلے
تم کہو گے تو زبانی بھی سناؤں لیکن
حال دل پوچھ تو لو دیدۂ تر سے پہلے
ہائے یہ بات اجالوں کو ابھی کیا معلوم
رات کس طرح سے گزری ہے سحر سے پہلے
جب بھی تعمیر نشیمن کا خیال آیا ہے
مشورہ ہم نے کیا برق و شرر سے پہلے
زندگانی میں مسرت کی تمنا گویا
وہ دعا ہے جو بھٹکتی ہے اثر سے پہلے
نہ وہ تارے نہ وہ ارماں نہ وہ دل کش نغمے
کتنے فانوس بجھے پچھلے پہر سے پہلے
سچ تو یہ ہے کہ ہمیں باغ جہاں میں عظمت
سیکڑوں خار ملے اک گل تر سے پہلے
آپ سے شکوۂ بیداد کروں یا نہ کروں (غزل)
آپ سے شکوۂ بیداد کروں یا نہ کروں
شوق پابند کو آزاد کروں یا نہ کروں
آپ ہیں وقت ہے فرصت ہے ذرا یہ کہہ دو
اب بیاں عشق کی روداد کروں یا نہ کروں
اے غم ہجر بتا اے دل مایوس بتا
ماتم حسرت ناشاد کروں یا نہ کروں
یوں تو اب کچھ بھی نہیں دیدۂ ویراں کو مگر
چند خوابوں سے بھی آباد کروں یا نہ کروں
میری قسمت میں سہی درد و الم کی راہیں
شادمانی کو کہیں یاد کروں یا نہ کروں
آج موسم نے کوئی مست غزل چھیڑی ہے
ضبط کو مائل فریاد کروں یا نہ کروں
زندگی عشق میں مٹنا ہے تو پھر ایسے میں
ناز تجھ پہ دل برباد کروں یا نہ کروں
انقلابات میں طوفان ستم میں عظمت
شان الطاف و کرم یاد کروں یا نہ کروں
حیات نو کا فسانہ سنائیں گے ہم لوگ (نظم)
حیات نو کا فسانہ سنائیں گے ہم لوگ
تلاش کر کے بہاروں کو لائیں گے ہم لوگ
مسافران شب زندگی کی راہوں میں
چراغ فکر و نظر کے جلائیں گے ہم لوگ
ہمارے چاک گریباں کو دیکھنے والو
وطن کو رشک گلستاں بنائیں گے ہم لوگ
جہاں کو امن و محبت کا واسطہ دے کر
مہہ و نجوم کی محفل سجائیں گے ہم لوگ
ضمیر فطرت انسانیت کو چونکا کر
عروج قسمت آدم دکھائیں گے ہم لوگ
وہ گیت جس سے بہاروں کی روح جاگ اٹھے
رباب زیست کے تاروں پہ گائیں گے ہم لوگ
شکوک و وہم کی تاریکیوں سے کیا لینا
یقین صبح کی راہوں پہ جائیں گے ہم لوگ
خیال و فکر کے خواب آفریں دھندلکوں میں
ضیائے حسن سحر تاب لائیں گے ہم لوگ
تصورات کی دنیا حسیں سہی لیکن
حقیقتوں کو حسیں تر بنائیں گے ہم لوگ
خلوص کار سے ملتی ہے زندگی عظمتؔ
خلوص کار کو رہبر بنائیں گے ہم لوگ