عزم بہزاد کی منتخب غزلیں اور نظمیں۔
میں عمر کے رستے میں چپ چاپ بکھر جاتا (غزل)
میں عمر کے رستے میں چپ چاپ بکھر جاتا
اک دن بھی اگر اپنی تنہائی سے ڈر جاتا
میں ترک تعلق پر زندہ ہوں سو مجرم ہوں
کاش اس کے لیے جیتا اپنے لیے مر جاتا
اس رات کوئی خوشبو قربت میں نہیں جاگی
میں ورنہ سنور جاتا اور وہ بھی نکھر جاتا
اس جان تکلم کو تم مجھ سے تو ملواتے
تسخیر نہ کر پاتا حیران تو کر جاتا
کل سامنے منزل تھی پیچھے مری آوازیں
چلتا تو بچھڑ جاتا رکتا تو سفر جاتا
میں شہر کی رونق میں گم ہو کے بہت خوش تھا
اک شام بچا لیتا اک روز تو گھر جاتا
محروم فضاؤں میں مایوس نظاروں میں
تم عزمؔ نہیں ٹھہرے میں کیسے ٹھہر جاتا
کتنے موسم سرگرداں تھے مجھ سے ہاتھ ملانے میں (غزل)
کتنے موسم سرگرداں تھے مجھ سے ہاتھ ملانے میں
میں نے شاید دیر لگا دی خود سے باہر آنے میں
ایک نگاہ کا سناٹا ہے اک آواز کا بنجر پن
میں کتنا تنہا بیٹھا ہوں قربت کے ویرانے میں
آج اس پھول کی خوشبو مجھ میں پیہم شور مچاتی ہے
جس نے بے حد عجلت برتی کھلنے اور مرجھانے میں
ایک ملال کی گرد سمیٹے میں نے خود کو پار کیا
کیسے کیسے وصل گزارے ہجر کا زخم چھپانے میں
جتنے دکھ تھے جتنی امیدیں سب سے برابر کام لیا
میں نے اپنے آئندہ کی اک تصویر بنانے میں
ایک وضاحت کے لمحے میں مجھ پر یہ احوال کھلا
کتنی مشکل پیش آتی ہے اپنا حال بتانے میں
پہلے دل کو آس دلا کر بے پروا ہو جاتا تھا
اب تو عزمؔ بکھر جاتا ہوں میں خود کو بہلانے میں
خرابی کا آغاز (نظم)
خرابی کا آغاز
کب اور کہاں سے ہوا
یہ بتانا ہے مشکل
کہاں زخم کھائے
کہاں سے ہوئے وار
یہ بھی دکھانا ہے مشکل
کہاں ضبط کی دھوپ میں ہم بکھرتے گئے
اور کہاں تک کوئی صبر ہم نے سمیٹا
سنانا ہے مشکل
خرابی بہت سخت جاں ہے
ہمیں لگ رہا تھا یہ ہم سے الجھ کر
کہیں مر چکی ہے
مگر اب جو دیکھا تو یہ شہر میں
شہر کے ہر محلے میں ہر ہر گلی میں
دھوئیں کی طرح بھر چکی ہے
خرابی روئیں میں
خوابوں میں، خواہش میں
رشتوں میں گھر چکی ہے
خرابی تو لگتا ہے
خوں میں اثر کر چکی ہے
جب بھی جہاں سے ہوا ہو
خرابی کے انجام سے غالباً
جاں چھڑانا ہے مشکل