علی میاں کامل لکھنوی کی منتخب غزلیں اور نظمیں۔
حیا سے بالوں میں چہرے کو ہو چھپائے ہوئے (غزل)
حیا سے بالوں میں چہرے کو ہو چھپائے ہوئے
کہاں سے آتے ہو جاگے ہوئے نہائے ہوئے
ادھر بھی ایک نظر دیکھ لو برائے خدا
تمہاری آنکھوں پہ بیٹھے ہیں زہر کھائے ہوئے
ہمیں ستاؤ نہ للہ اکھڑی باتوں سے
ہم آپ گردش گردوں کے ہیں ستائے ہوئے
عزیز داغ محبت ہے اس قدر مجھ کو
فنا کے بعد بھی چھاتی سے ہوں لگائے ہوئے
فنا کے بعد بھی گردش ہے میری قسمت میں
لئے پھرے گی ہوا خاک کو اڑائے ہوئے
پڑے ہیں ٹوٹے ہوئے ہر قدم پہ شیشۂ دل
سنبھل کے راہ چلو پاؤں کو بچائے ہوئے
سوال وصل جو کرتا ہوں تو وہ کہتے ہیں
مجھی پہ بیٹھے ہیں کیا آپ زہر کھائے ہوئے
کمر پہ یار کی ہاتھوں کا بوجھ کیا ڈالوں
وہ آپ گیسوؤں کے بار ہیں اٹھائے ہوئے
کفن میں یار کی تصویر رکھ دیں دفن کے وقت
لحد سے اٹھوں گا اس کو گلے لگائے ہوئے
چلا ہوں سونے کو پہلوئے قبر میں کاملؔ
جگر پہ تیغ محبت کا زخم کھائے ہوئے
خضر کے مانند خواہاں زندگانی کا نہیں (غزل)
خضر کے مانند خواہاں زندگانی کا نہیں
اے اجل تشنہ میں اس دریا کے پانی کا نہیں
قید ہو کر لطف عمر جاودانی کا نہیں
حظ تمہیں اے خضر اپنی زندگانی کا نہیں
مشتری کوئی یہاں جنس معانی کا نہیں
ایک بھی گاہک متاع نکتہ دانی کا نہیں
سن ابھی کم ہے نہ کھولو روئے روشن سے نقاب
آئنہ صورت نما حسن جوانی کا نہیں
کیوں اترتا ہے ہمارے قلزم مواج میں
آشنا اے دوست تو بحر معانی کا نہیں
اک نظر صورت دکھا کر کیجیے مجھ سے حجاب
یوں مزہ اے بندہ پرور لن ترانی کا نہیں
دید یوسف کا فقط طالب ہوں اے بازار مصر
غم مجھے قیمت کی ارزانی گرانی کا نہیں
با معانی ہے سخن میرا سمجھ کر اس کو دیکھ
یہ جریدہ ہم نشیں اژرنگ مانی کا نہیں
درد کو ہمراہ کیوں لاتا ہے دل میں وہ خدنگ
کیا سلیقہ خود اسے راحت رسانی کا نہیں
دیکھ کر لبریز خوں کیا مانگتے ہو مجھ سے تم
دل ہے یہ ساغر شراب ارغوانی کا نہیں
کیوں ہمارے دل میں آ کر آرزوئیں پھر گئیں
یہ سرائے حزن ہے گھر شادمانی کا نہیں
آج تو ہی اے جگر سیخ نفس پر ہو کباب
کوئی ساماں درد دل کی میہمانی کا نہیں
پا برہنہ ہو کے موسیٰ آگ لینے کو بڑھیں
وادیٔ ایمن ہے یہ صحرا شبانی کا نہیں
ربط رکھنا اب حسینوں سے ہے کاملؔ بے محل
شور و شر کے دن گئے موسم جوانی کا نہیں