پیر • 5 اکتوبر 2026ء
📚 کتب خانہ ۱۴۸٬۸۹۴

علی ارمان کی غزلیں — Ali Arman Ghazals

علی ارمان کی منتخب غزلیں اور نظمیں۔

ٹہنی ٹہنی سے خون جاری ہے (غزل)

ٹہنی ٹہنی سے خون جاری ہے

ہم نے ایسے خزاں گزاری ہے

ایسا لگتا ہے نیلی جھیلوں کی

تیری آنکھوں سے رشتہ داری ہے

میں ہوں شاگرد اس لیے اس کا

عشق سب سے بڑا مداری ہے

خواب دیکھا کہ اک شجر ہوں میں

اور ترے ہاتھ میں اک آری ہے

میری تصویر کی طرف دیکھو

جس نے رو رو کے شب گزاری ہے

ایک چانٹا پڑا تو جانو گے

وقت کا ہاتھ کتنا بھاری ہے

روح کو دے کے نیند کی گولی

سیر اس کے بدن کی جاری ہے

میں ذرا پانی پی کے آتا ہوں

تری قربت بہت کراری ہے

ہر شکاری کی تاک میں بیٹے

کوئی اس سے بڑا شکاری ہے

کام اب وہ چراغ کر رہے ہیں

جو ہواؤں کی ذمہ داری ہے

اک دھماکہ ہوا ہے سینما میں

مر گئے لوگ فلم جاری ہے

جون صاحب مرے معاملے میں

ہجر میں بھی وصال طاری ہے

جا رہے ہیں خدا سے ملنے ہم

یہ زمیں تو بس اک سواری ہے

دل ہے تیری جدائی میں جیسے

کوئی ہارا ہوا جواری ہے

مار ڈالا ہے ایک کمسن نے

ہونٹ ہلکے ہیں بوسہ بھاری ہے

عام ہونے لگا ہے تھوڑا بہت

جو مرا دین تازہ کاری ہے

علی ارمانؔ کو سنبھال کے رکھ

یہ ترا آخری پجاری ہے

چشمہ کبھی ندی کبھی دریا مرا دریا (غزل)

چشمہ کبھی ندی کبھی دریا مرا دریا

چلتا رہا بہروپ بدلتا مرا دریا

بے چین در ہجر میں ہر بحر کی بانہیں

اور حسرت پا بوسیٔ صحرا مرا دریا

بہتا ہے کسی منظر نادیدہ کی دھن میں

بیگانۂ ہر چشم شناسا مرا دریا

ہر موج ہے آئینۂ گرداب شب و روز

ہر عکس میں رکھتا ہے زمانہ مرا دریا

مجھ پر بھی ہویدا نہیں ہوتی مری خواہش

سیراب مری موج ہے پیاسا مرا دریا

ندی مرے سینے میں مچلتی تری ندی

دریا تری آنکھوں میں چمکتا ترا دریا

خود اصل تمنا ہوں کروں کس کی تمنا

میرے ہی سمندر میں گرے گا مرا دریا

لگتا ہے کہیں اور بھی میں بہتا رہا ہوں

پہلے بھی کوئی تھی مری دنیا مرا دریا

ندی کی ہر اک لہر کے لب پر ہے یہ نغمہ

دریا مرا دریا مرا دریا مرا دریا

ہر منزل تہذیب ہے تخریب کی زد میں

بہتا ہے بناتا ہوا رستا مرا دریا

بے سبزہ و گل ٹھہری مری خاک تن خواب

میری ہی زمیں سے نہیں گزرا مرا دریا

اے خاک زمیں تو بھی ہے زندہ مرے دم سے

دل بن کے ترے جسم میں دھڑکا مرا دریا

بادل کبھی بارش کبھی شعلہ تری باتیں

بے کل کبھی جل تھل کبھی جلتا مرا دریا

کس کام کے میرے لیے صدیوں کے سمندر

اے ریت کہاں ہے مرا لمحہ مرا دریا

جاری ہے تحیر کے کناروں کا کٹاؤ

اب تک کہیں جا کر نہیں اترا مرا دریا

اے کاش کہ ہر لہر کو پر لگ گئے ہوتے

چھوتا تری پلکوں کا ستارا مرا دریا

صحرا ہے اسی پیاس سے سیراب ابھی تک

جس شام لہو رنگ ہوا تھا مرا دریا

ارمانؔ میں اک زخم دل موجۂ جو ہوں

لیکن ہے یہی درد تمنا مرا دریا

مزید غزلیں از علی ارمان ←ابھی کوئی غزل منسلک نہیں