علینا عترت کی منتخب غزلیں اور نظمیں۔
زندہ رہنے کی یہ ترکیب نکالی میں نے (غزل)
زندہ رہنے کی یہ ترکیب نکالی میں نے
اپنے ہونے کی خبر سب سے چھپا لی میں نے
جب زمیں ریت کی مانند سرکتی پائی
آسماں تھام لیا جان بچا لی میں نے
اپنے سورج کی تمازت کا بھرم رکھنے کو
نرم چھاؤں میں کڑی دھوپ ملا لی میں نے
مرحلہ کوئی جدائی کا جو درپیش ہوا
تو تبسم کی ردا غم کو اوڑھا لی میں نے
ایک لمحے کو تری سمت سے اٹھا بادل
اور بارش کی سی امید لگا لی میں نے
بعد مدت مجھے نیند آئی بڑے چین کی نیند
خاک جب اوڑھ لی جب خاک بچھا لی میں نے
جو علیناؔ نے سر عرش دعا بھیجی تھی
اس کی تاثیر یہیں فرش پہ پا لی میں نے
خزاں کی زرد سی رنگت بدل بھی سکتی ہے (غزل)
خزاں کی زرد سی رنگت بدل بھی سکتی ہے
بہار آنے کی صورت نکل بھی سکتی ہے
جلا کے شمع اب اٹھ اٹھ کے دیکھنا چھوڑو
وہ ذمہ داری سے از خود پگھل بھی سکتی ہے
ہے شرط صبح کے رستے سے ہو کے شام آئے
تو رات اس کو سحر میں بدل بھی سکتی ہے
ذرا سنبھل کے جلانا عقیدتوں کے چراغ
بھڑک نہ جائیں کہ مسند یہ جل بھی سکتی ہے
ابھی تو چاک پہ جاری ہے رقص مٹی کا
ابھی کمہار کی نیت بدل بھی سکتی ہے
یہ آفتاب سے کہہ دو کہ فاصلہ رکھے
تپش سے برف کی دیوار گل بھی سکتی ہے
ترے نہ آنے کی تشریح کچھ ضروری نہیں
کہ تیرے آتے ہی دنیا بدل بھی سکتی ہے
کوئی ضروری نہیں وہ ہی دل کو شاد کرے
علیناؔ آپ طبیعت بہل بھی سکتی ہے
مجھے تو انتظار عشق میں ہی لطف آتا ہے (نظم)
مجھے تو انتظار عشق میں ہی لطف آتا ہے
کسی کی چاہتوں کا رنگ ہر دھڑکن پہ طاری ہو
عجب سا کرب بے چینی مسلسل بے قراری ہو
نگاہیں منتظر فرقت کسک اور آہ و زاری ہو
کبھی پہلو میں ملتا ہے کبھی وہ دور جاتا ہے
کسی کے جسم و جاں کو عشق ہر لمحہ جلاتا ہے
تصور کیسے کیسے دل نشیں منظر دکھاتا ہے
ابھی تو فرقت جاناں کے قصے خوب لکھنے ہیں
دبی چاہت کے نغمے اور ترانے خوب لکھنے ہیں
رفاقت میں جدائی کے فسانے خوب لکھنے ہیں
علیناؔ انتظار عشق غزلوں کو سجا دے گا
وصال یار تو بس چند لمحوں کا مزا دے گا
ملن ہو پھر جدائی ایسا پل ہر پل سزا دے گا