الحاج الحافظ کی منتخب غزلیں اور نظمیں۔
اپنا معیار جدا اپنا ہے کردار جدا (غزل)
اپنا معیار جدا اپنا ہے کردار جدا
اپنا ساقی ہے جدا ساغر و میخوار جدا
بخت اپنا ہے جدا اپنا ہے دل دار جدا
شوخ نظریں ہیں الگ ابروئے خم دار جدا
میں زمانے سے جدا کوچہ و بازار جدا
میرا انداز انوکھا مری رفتار جدا
بزم میں میں بھی رقیبوں کو جگہ دیتا ہوں
جس طرح گل سے کبھی ہو نہ سکے خار جدا
ایسی برسات کی رت ہم نے نہ دیکھی تھی کبھی
مے جدا ابر جدا ساقی و مے خوار جدا
فصل گل قید قفس آنکھوں کا بھرنا ان پر
چھائی ہے کالی گھٹا اور ہے گلزار جدا
کوئی برگشتہ رہے بیٹھ رہے اپنے گھر
اپنی محفل ہے جدا دوست و غم خوار جدا
آپ کے خلق سے دیوانؔ سبھی یکجا ہیں
ورنہ لندن میں تو رہتے رہے فن کار جدا
یہ غزل وہ ہے کہ دیوانؔ ہمیں کہنا پڑا
طرز اپنی ہے الگ اپنے ہیں اشعار جدا
یہ کیسے لوگ ہیں جو راہ میں ناچار بیٹھے ہیں (غزل)
یہ کیسے لوگ ہیں جو راہ میں ناچار بیٹھے ہیں
بڑے ناداں مسافر ہیں کہ ہمت ہار بیٹھے ہیں
اگر پہلو سے وہ اٹھے تو دل اپنا نہ کیوں بیٹھے
غرض مرنے کو ہر صورت سے ہم تیار بیٹھے ہیں
زمانے نے نہ دی فرصت جو ہم خدمت بجا لاتے
کسی نے کب ہمیں دیکھا کہ ہم بیکار بیٹھے ہیں
کسے فرصت خبر لے درد مندوں کی شب غم میں
ہزاروں بار اٹھے ہیں ہزاروں بار بیٹھے ہیں
کبھی اٹھے تو گرم جستجوئے دوست میں اٹھے
کبھی بیٹھے تو محو آرزوئے یار بیٹھے ہیں
جنون عشق میں صحرا نوردی چاک دامانی
یہی سب کر کے گویا تھک گئے بیکار بیٹھے ہیں
نہ راہوں سے شناسائی نہ رہبر سے تعارف ہے
ہزاروں جستجوئیں کر کے ہمت ہار بیٹھے ہیں
عجب یہ رنگ محفل ہے کہیں تو کیا کہیں ہمدم
بہر صورت ہم اس کی بزم میں بیزار بیٹھے ہیں
کبھی دیوانؔ سے دیکھا نہیں خالی ہو مے خانہ
جہاں بھی دیکھیے جا کر وہیں سرکار بیٹھے ہیں