اکمل آلدوری کی منتخب غزلیں اور نظمیں۔
تیرے میخانے کا یہ بھی عجب دستور ہے ساقی (غزل)
تیرے میخانے کا یہ بھی عجب دستور ہے ساقی
کوئی تشنہ دہن مستی میں کوئی چور ہے ساقی
دلوں کے ربط پیہم کو خدا قائم رکھے ہمدم
نہ میں ہوں دور ساقی سے نہ مجھ سے دور ہے ساقی
بہل جائے جہاں دل ہے وہی جنت حقیقت میں
جو دل انسان کا لے لے وہ انساں حور ہے ساقی
نہ لے مختاریوں سے کام تو اس کے مقابل میں
تیرے مے کش کے سینے میں دل مجبور ہے ساقی
مری خودداریاں بد کیفیوں سے دب نہیں سکتیں
اگرچہ شیشۂ دل اپنا چکنا چور ہے ساقی
تری جادو بھری آنکھوں نے ایسی مے پلائی ہے
ہماری زندگی کی زندگی مخمور ہے ساقی
ٹھکانہ ہی نہیں کوئی مرے ارمان مستی کا
نہ یہ محدود ہے ساقی نہ وہ محصور ہے ساقی
جہاں حاجت نہ مے کی ہے نہ شیشے کی نہ ساغر کی
ابھی وہ منزل ہستی نہایت دور ہے ساقی
عنایت سے پلا دے رند خود اطوار اکملؔ کو
تری دریا دلی کونین میں مشہور ہے ساقی
توجہ کون کرتا اور محبت کون کرتا ہے (غزل)
توجہ کون کرتا اور محبت کون کرتا ہے
نہ ہو توفیق گر تیری عبادت کون کرتا ہے
لہو سے قلب کے پلکوں کی زینت کون کرتا ہے
نمائش غم کی ہم رنگ مسرت کون کرتا ہے
بجز عاشق کے عکاسیٔ فطرت کون کرتا ہے
عیاں لب سے محبت کی حقیقت کون کرتا ہے
دل صد چاک کے آئینہ میں دنیا نظر آئے
کشادہ اس قدر آغوش فطرت کون کرتا ہے
اگر وہ پھیر لیں منہ جن سے امیدیں ہیں وابستہ
ہمارے حال پر چشم عنایت کون کرتا ہے
نہ جانے کس جگہ اس وقت ہے گم گشتہ منزل
ہمارے قافلے کی اب قیادت کون کرتا ہے
وفور کیف غم میں اشک بہنا بات ہے فطری
خود اپنے خون دل سے آپ نفرت کون کرتا ہے
ہمارے دل کو درد عشق نے مسند بنا ڈالا
کہ دل کے ماسوا اب اس کی عزت کون کرتا ہے