اختر ضیائی کی منتخب غزلیں اور نظمیں۔
دم عیسیٰ ید بیضا کے قرینے والے (غزل)
دم عیسیٰ ید بیضا کے قرینے والے
اب نہ منصور نہ سقراط سے پینے والے
وہی کوفی وہی لشکر وہی پیمان وفا
وہی آثار محرم کے مہینے والے
دم نکلتا ہے نہ سر جھکتا ہے دیوانوں کا
جانے کس آس پہ جیتے ہیں یہ جینے والے
یہ جو ساحل کے مناظر ہیں جو آوازیں ہیں
جا کے اس پار نہ پائیں گے سفینے والے
ہم محبت کی علامت ہیں جناب واعظ
ہم عداوت کے طلب گار نہ کینے والے
ایک پیغام ہو شاید مری خاموشی بھی
تجھ کو معلوم نہیں لب مرے سینے والے
آج کچھ لوگ ہیں صورت گر حالات اخترؔ
اور کچھ لوگ ہیں ماضی کے دفینے والے
ان کو تھوڑی سی اخوت بھی عطا ہو جائے
یہ جو لیتے ہیں ترا نام مدینے والے
ہم نشیں رات ہے تو رات بھی ڈھل جائے گی (غزل)
ہم نشیں رات ہے تو رات بھی ڈھل جائے گی
صبح دم صورت حالات بدل جائے گی
حدت شوق سلامت ہے تو زنجیر جفا
صورت شمع کسی روز پگھل جائے گی
ان کا دم بھرتے ہو تو غم نہ کرو آخر کار
ان پہ دم دینے کی حسرت بھی نکل جائے گی
ہم صفیرو کبھی مٹتی ہے تمنائے بہار
یہ کسی پھول کسی شعلے میں ڈھل جائے گی
یہی بہتر ہے کہ قربان وفا ہو جائے
جاں اگر آج نہ جائے گی تو کل جائے گی
کس کو معلوم تھا ملبوس صبا میں صرصر
آ کے گلشن میں شگوفوں کو مسل جائے گی
اب کے ساون بھی اگر ابر نہ برسا اخترؔ
جو کلی شاخ پہ نکلے گی وہ جل جائے گی
تیرے بارے میں سوچتا ہوں میں (نظم)
تیرے بارے میں سوچتا ہوں میں
بعض اوقات جب اکیلے میں
اور کوئی نہ پاس بیٹھا ہو
اور کئی بار اور لوگوں کی
بھیڑ کے باوجود جان وفا
مجھ کو تیرا خیال آتا ہے
در حقیقت گداز الفت میں
انتہائے فشار حسرت میں
شدت سوز و ساز فرقت میں
جب مرا جی اداس ہوتا ہے
وقف حرمان و یاس ہوتا ہے
اور کسی ہمدم و یگانے سے
مسکرا کر کسی بہانے سے
اذن اظہار چاہتا ہوں میں
کوئی غم خوار چاہتا ہوں میں