اختر ملک کی غزلیں — Akhtar Malik Ghazals

اختر ملک کی منتخب غزلیں اور نظمیں۔

قرب کے نہ وفا کے ہوتے ہیں (غزل)

قرب کے نہ وفا کے ہوتے ہیں

جھگڑے سارے انا کے ہوتے ہیں

بات نیت کی صرف ہے ورنہ

وقت سارے دعا کے ہوتے ہیں

بھول جاتے ہیں مت برا کہنا

لوگ پتلے خطا کے ہوتے ہیں

وہ بظاہر جو کچھ نہیں لگتے

ان سے رشتے بلا کے ہوتے ہیں

وہ ہمارا ہے اس طرح شاید

جیسے بندے خدا کے ہوتے ہیں

بخش دینا بھی ٹھیک ہے لیکن

کچھ سلیقے عطا کے ہوتے ہیں

کچھ کو دنیا بکھیر دیتی ہے

کچھ پریشاں سدا کے ہوتے ہیں

وہ جو ہستی میں ڈوب جاتے ہیں

ان کے چرچے بلا کے ہوتے ہیں

اس کی فطرت ہی ایسی ہے اخترؔ

جیسے تیور ہوا کے ہوتے ہیں

اک بار جو بچھڑے وہ دوبارہ نہیں ملتا (غزل)

اک بار جو بچھڑے وہ دوبارہ نہیں ملتا

مل جائے کوئی شخص تو سارا نہیں ملتا

اس کی بھی نکل آتی ہے اظہار کی صورت

جس شخص کو لفظوں کا سہارا نہیں ملتا

پھر ڈوبنا یہ بات بہت سوچ لو پہلے

ہر لاش کو دریا کا کنارا نہیں ملتا

یہ سوچ کے دل پھر سے ہے آمادۂ الفت

ہر بار محبت میں خسارہ نہیں ملتا

کیوں لوگ بلائیں گے ہمیں بزم سخن میں

اپنا تو کسی سے بھی ستارہ نہیں ملتا

وہ شہر بھلا کیسے لگے اپنا جہاں پر

اک شخص بھی ڈھونڈے سے ہمارا نہیں ملتا