عبد الحفیظ نعیمی کی منتخب غزلیں اور نظمیں۔
دعا کو ہاتھ مرا جب کبھی اٹھا ہوگا (غزل)
دعا کو ہاتھ مرا جب کبھی اٹھا ہوگا
قضاوقدر کا چہرہ اتر گیا ہوگا
جو اپنے ہاتھوں لٹے ہیں بس اس پہ زندہ ہیں
خدا کچھ ان کے لیے بھی تو سوچتا ہوگا
تری گلی میں کوئی سایہ رات بھر اب بھی
سراغ جنت گم گشتہ ڈھونڈتا ہوگا
جو غم کی آنچ میں پگھلا کیا اور آہ نہ کی
وہ آدمی تو نہیں کوئی دیوتا ہوگا
تمہارے سنگ تغافل کا کیوں کریں شکوہ
اس آئنے کا مقدر ہی ٹوٹنا ہوگا
ہے میرے قتل کی شاہد وہ آستیں بھی مگر
میں کس کا نام لوں سو بار سوچنا ہوگا
یہ میری پیاس کے ساغر تیرے لبوں کی شراب
رواج و رسم محبت کا معجزہ ہوگا
پھرآرزو کےکھنڈر رنگ و بو میں ڈوب چلے
فریب خوردہ کوئی خواب دیکھتا ہوگا
ستارےبھی تری یادوں کے بجھتے جاتے ہیں ہیں
غم حیات کا سورج نکل رہا ہوگا
صدا کسے دیں نعیمیؔ کسے دکھائیں زخم
اب اتنی رات گئے کون جاگتا ہوگا
ہر انساں اپنے ہونے کی سزا ہے (غزل)
ہر انساں اپنے ہونے کی سزا ہے
بھرے بازار میں تنہا کھڑا ہے
نئے دربانوں کے پہرے بٹھاؤ
ہجوم درد بڑھتا جا رہا ہے
رہے ہم ہی جو ہر پتھر کی زد میں
ہماری سر بلندی کی خطا ہے
مہکتے گیسوؤں کی رات گزری
سوا نیزے پہ اب سورج کھڑا ہے
مرے خوابوں کی چکنی سیڑھیوں پر
نہ جانے کس کا بت ٹوٹا پڑا ہے
وہ شعلے ہوں لہو ہو حادثے ہوں
مری ہی زندگی پر تبصرہ ہے
تری زلفیں تو ہیں بدنام یونہی
مجھے دن کے اجالوں نے ڈسا ہے
چلو چپکے سے کچھ بت اور رکھ آئیں
در کعبہ ابھی شاید کھلا ہے
اتر کر تو فصیل شب سے دیکھو
سحر نے خودکشی کر لی سنا ہے
ابھی طاق تصور پر نعیمیؔ
چراغ لذت شب جل رہا ہے