عاشق حسین بزم آفندی کی منتخب غزلیں اور نظمیں۔
کچھ بھی کر سکتا نہیں تدبیر سے (غزل)
کچھ بھی کر سکتا نہیں تدبیر سے
آدمی مجبور ہے تقدیر سے
ٹکڑے کیوں کرتے ہو دل شمشیر سے
توڑو یہ شیشہ نگہ کے تیر سے
جم سکی رنگت نہ بزم غیر میں
اکھڑی اکھڑی آپ کی تقریر سے
عاشقوں پر ظلم کرنے کے سوا
اور کیا آتا ہے چرخ پیر سے
کیوں مرید عشق اے وحشت نہ ہوں
سلسلہ ملتا ہے یہ زنجیر سے
لو تواضع کا کمانوں سے سبق
راہ کرنا دل میں سیکھو تیر سے
قابل تیغ ادا کیا ہم نہیں
کاٹتے ہو کیوں گلا شمشیر سے
یہ تمنا ہے کہ دیکھا ہی کروں
جی بہلتا ہے تری تصویر سے
ہے یہ نقشہ چار دن کے ہجر میں
شکل اب ملتی نہیں تصویر سے
لے کے دل ان کی دلیری دیکھیے
کیسے آ بیٹھے ہیں بے تقصیر سے
وصل کی شب میں بھی الجھن ہی رہی
آپ کی الجھی ہوئی تقدیر سے
ضبط کب تک ایک دن آخر تجھے
کھینچ لیں گے آہ کی تاثیر سے
آج فکر غیر میں جاتا تھا میں
مل گئے وہ خوبیٔ تقدیر سے
آڑ میں ان کی فلک بچ بچ گیا
ورنہ دبتے ہیں جواں کب پیر سے
اعتراضوں پر تلے ہیں کیوں حریف
بزمؔ کیا حاصل ہے اس تقدیر سے
میں تو دل دادہ فصاحت کا ہوں بزمؔ
کیوں نہ ہو الفت کلام میرؔ سے
سچ کہو کس نے لیا دل کہ جو پایا نہ گیا (غزل)
سچ کہو کس نے لیا دل کہ جو پایا نہ گیا
یاں ہمیں تم ہیں کوئی اور نہ آیا نہ گیا
دل میں تھی آگ لگی دیدۂ تر کو دیکھو
گھر جلا پاس کا اور اس سے بجھایا نہ گیا
دن یہ فرقت کا بڑھا چار پہر ساعت بھر
پائے دیوار سے ہٹ کر کہیں سایا نہ گیا
دل تڑپتا رہا پھر ضعف کے باعث مجھ سے
ضبط کا اپنے بھی احسان اٹھایا نہ گیا
دل مرا مر کے رہا آٹھ پہر پہلو میں
ہائے محتاج کا مردہ تھا اٹھایا نہ گیا
وعدہ کر کر کے جگایا مجھے راتوں کو مگر
میری سوتی ہوئی قسمت کو جگایا نہ گیا
یا تو یہ شوق تھا حال ان کو سناؤں جو ملیں
وائے قسمت جو ملے وہ تو سنایا نہ گیا
غیر جب ہو گیا ناراض منانے کو گئے
ایک دن روٹھ گیا میں تو منایا نہ گیا
بزم سے اس کی چلے آؤ جو بگڑا وہ بت
بیٹھنے کو کوئی فقرہ بھی بنایا نہ گیا
میرے مرنے کی خبر سن کے بھلا کیا آتے
ان سے اک بار عیادت کو بھی آیا نہ گیا
ان کی مہندی کی رہی خوب جمالی رنگت
ہم سے تو رنگ بھی محفل میں جمایا نہ گیا
مٹ گئے سنگ در یار پہ گھس گھس کے جبیں
اپنی تقدیر کے لکھے کو مٹایا نہ گیا
دونوں مجبور رہے ضعف و نزاکت کے سبب
ہم وہاں جا نہ سکے یار سے آیا نہ گیا
دور بیٹھا ہوا بھی ہم کو نہ وہ دیکھ سکے
بزم میں غیر کو پہلو سے اٹھایا نہ گیا
اس نزاکت پہ نہ کیوں جان کو قرباں کر دوں
کہ گلے پر مرے خنجر بھی پھرایا نہ گیا
ایک شب عرش پہ محبوب کو بلوا ہی لیا
ہجر وہ غم ہے خدا سے بھی اٹھایا نہ گیا
بزمؔ طاقت یہ گھٹی ہجر کی شب آہ جو کی
دل سے لب تک کئی ٹھیکوں میں بھی آیا نہ گیا