حسرتؔ موہانی پَیروِ عِشقِ رہنُما نہ ہُوا زاہِدِ خ…
حسرتؔ موہانی
پَیروِ عِشقِ رہنُما نہ ہُوا
زاہِدِ خُشک، باخُدا نہ ہُوا
کون لاتا تِرے عتاب کی تاب
خیر گُزری، کہ سامنا نہ ہُوا
عِشق یا حُسن، کون غالب ہے؟
آج تک اِس کا فیصلہ نہ ہُوا
خلشِ خارِ عِشق مِٹ نہ سکی
چارۂ جانِ مُبتلا، نہ ہُوا
حُسنِ بے مہر نے یہ کُچھ نہ کِیا
مونسِ عِشق بے نَوا نہ ہُوا
تُم جفاکار تھے، کرم نہ کِیا
مَیں وفادار تھا، خفا نہ ہُوا
بڑھ گیا اور بھی تغافلِ حُسن !
نالۂ عِشق، نارَسا نہ ہُوا
راحتِ جانِ عاشقاں، نہ ہُوئی!
تُجھ سے اِتنا بھی اے قضا! نہ ہُوا
اُس پہ آسائشِ بَقا ہے حرام
جوتِری راہ میں فنا نہ ہُوا
لُطفِ ساقی تھا بے دریغ، مگر!
مُجھ بَلا نوش کا، بھلا نہ ہُوا
چِھڑ گئی جب جمالِ یار کی بات
ختم تا دیر سِلسِلہ نہ ہُوا
جِسم سے رُوح ہوگئی آزاد
لفظ معنی سے گو جُدا نہ ہُوا
عِشقِ حسرتؔ کے سب ہُوئے قائل
ایک وہ، دُشمنِ وفا، نہ ہُوا
مولانا حسرّت موہانی