پیر • 5 اکتوبر 2026ء
📚 کتب خانہ ۱۴۸٬۸۹۴

اسداللہ خاں غالبؔ . درد منّت کشِ دَوا نہ ہُوا میں …

اسداللہ خاں غالبؔ
.
درد منّت کشِ دَوا نہ ہُوا
میں نہ اچّھا ہُوا ، بُرا نہ ہُوا

جمع کرتے ہو کیوں رقیبوں کو
اِک تماشا ہُوا ، گِلہ نہ ہُوا

ہم کہاں قِسمت آزمانے جائیں
تُو ہی جب، خنجر آزما نہ ہُوا

کتنے شِیریں ہیں تیرے لب، کہ رقیب!
گالِیاں کھا کے، بے مزہ نہ ہُوا

ہے خبر گرم اُن کے آنے کی
آج ہی گھر میں بَورِیا ، نہ ہُوا

کیا وہ نمرُود کی خُدائی تھی
بندگی میں مِرا ، بھلا نہ ہُوا

جان دِی، دِی ہُوئی اُسی کی تھی
حق، تو یُوں ہے کہ، حق ادا نہ ہُوا

زخم گر دَب گیا، لہُو نہ تھما
کام گر رُک گیا، رَوا نہ ہُوا

رہزنی ہے کہ دِل ستانی ہے
لے کے دِل، دِلستاں روانہ ہُوا

کچھ تو پڑھیے کہ لوگ کہتے ہیں!
آج غالؔب غزل سَرا نہ ہُوا

مِرزا اسداللہ خاں غالؔب