حسرتؔ موہانی . لائقِ حزبِ اَولِیا، نہ ہُوا وہ جو …
حسرتؔ موہانی
.
لائقِ حزبِ اَولِیا، نہ ہُوا
وہ جو بے خوفِ ماسوا، نہ ہُوا
اُس جفاکار سے خُدا کی پناہ!
جو تِرا بندۂ وفا نہ ہُوا
سخت ہے عِشق میں، مقامِ رضا
ہم سے بھی ،طے یہ مرحَلہ نہ ہُوا
عِشق بازی وہ کیا کرے گا، جسے!
خندۂ زخم، دِل کُشا نہ ہُوا
جاں نِثاری بھی کیا ہے اُس کی، جسے!
جانِثاری کا حوصلہ نہ ہُوا
لذّتِ عِشق کب مِلی، جب تک!
سر ، تہِ خنجرِ جَفا نہ ہُوا
قدرِ حُریّت اُس کو کیا معلُوم!
جو کبھی تیرا مُبتلا نہ ہُوا
سر تِرا بارِ دَوش ہے حسرتؔ
راہِ حق میں، اگر فِدا نہ ہُوا
مولانا حسرتؔ موہانی