پیر • 5 اکتوبر 2026ء
📚 کتب خانہ ۱۴۸٬۸۹۴

آنسو ہوں ہنس رہا ہوں شگوفوں کے درمیاں شبنم ہوں جل …

آنسو ہوں ہنس رہا ہوں شگوفوں کے درمیاں
شبنم ہوں جل رہا ہوں شراروں کے شہر میں
………
سلام مچھلی شہری کی وفات
November 19, 1973
(پیدائش: 1 جولائی 1921ء – وفات: 19 نومبر 1973ء)
——
منتخب کلام
——
نہیں میں شادماں ہوں زندگی پر ہنس بھی سکتا ہوں
اب اس کو کیا کروں گر ہو گئی ہے آنکھ نم ساقی
——
عروج آدم خاکی کا جشن ہے معبود
تیری طرف سے بھی کوئی پیام ہے کہ نہیں
——
تم اپنی بجلیوں کی نزاکت کو دیکھ لو
ہم جانتے ہیں اپنا نشیمن سنبھالنا
——
اک دل ہے اور وہ غمِ جاناں میں محو ہے
آ ، اے غمِ حیات ! مگر دیکھ بھال کے
——
شبِ وصال کے بجھتے چراغ کہتے ہیں
کہ اس فضا میں تنہائیاں ضروری ہیں
——
یہ سوچ کر کہ زہر بھی آبِ حیات ہے
خوش ہوں میں آستینوں میں کچھ سانپ پال کر
——
جگمگا اٹھتی ہے دل میں اک مقدس روشنی
جب نہیں ہوتا کہیں بھی آسرا میرے لیے
——
ہنس کر نہ دیکھ کہنہ چراغوں کو اے صبا
ان میں بھی زندگی کی حرارت ہے ، جوش ہے
——
بے شک حضور آپ خدا کی طرح رہیں
جینے کا حق ہمیں بھی ہے انساں کی طرح
——
میرے نغمے باغی بھی ہیں ، میرے نغمے پیارے بھی
اب جس کا جو ذوقِ نظر ہو ، پھول بھی ہیں انگارے بھی
——
یوں ہی آنکھوں میں آ گئے آنسو
جائیے آپ کوئی بات نہیں
——
آج تو شمع ہواؤں سے یہ کہتی ہے سلامؔ
رات بھاری ہے میں بیمار کو کیسے چھوڑوں
…….
اب ماحصل حیات کا بس یہ ہے اے سلامؔ
سگریٹ جلائی شعر کہے شادماں ہوئے
……
اے مرے گھر کی فضاؤں سے گریزاں مہتاب
اپنے گھر کے در و دیوار کو کیسے چھوڑوں
…….
عجیب بات ہے میں جب بھی کچھ اداس ہوا
دیا سہارا حریفوں کی بد دعاؤں نے
……
بجھ گئی کچھ اس طرح شمع سلامؔ
جیسے اک بیمار اچھا ہو گیا
……
میری فکر کی خوشبو قید ہو نہیں سکتی
یوں تو میرے ہونٹوں پر مصلحت کا تالا ہے
……
غم مسلسل ہو تو احباب بچھڑ جاتے ہیں
اب نہ کوئی دل تنہا کے قریں آئے گا
……
کاش تم سمجھ سکتیں زندگی میں شاعر کی ایسے دن بھی آتے ہیں
جب اسی کے پروردہ چاند اس پہ ہنستے ہیں پھول مسکراتے ہیں
……
کبھی کبھی عرض غم کی خاطر ہم اک بہانا بھی چاہتے ہیں
جب آنسوؤں سے بھری ہوں آنکھیں تو مسکرانا بھی چاہتے ہیں
….
کبھی کبھی تو سنا ہے ہلا دیے ہیں محل
ہمارے ایسے غریبوں کی التجاؤں نے
…..
میری موت اے ساقی ارتقا ہے ہستی کا
اک سلامؔ جاتا ہے ایک آنے والا ہے
…..
رات دل کو تھا سحر کا انتظار
اب یہ غم ہے کیوں سویرا ہو گیا
….
روز پوجا کے لئے پھول سجاتا ہے سلامؔ
جانے کب اس کا خدا سوئے زمیں آئے گا
…..
شکریہ اے گردش جام شراب
میں بھری محفل میں تنہا ہو گیا
…..
وہ دل سے تنگ آ کے آج محفل میں حسن کی تمکنت کی خاطر
نظر بچانا بھی چاہتے ہیں نظر ملانا بھی چاہتے ہیں
…..
وہ صرف میں ہوں جو سو جنتیں سجا کر بھی
اداس اداس سا تنہا دکھائی دینے لگے
…..
یوں ہی آنکھوں میں آ گئے آنسو
جائیے آپ کوئی بات نہیں
…………..
غم پر ہیں طعنہ زن تو خوشی بھی نبھائیے
سرکار میری بادہ کشی بھی نبھائیے
موتی سے اشک آپ کے قدموں کو تھے عزیز
سوکھے ہوئے لبوں کی ہنسی بھی نبھائیے
پہلے تو موج گل تھی مرے ہر خیال میں
اب فکر کی یہ شعلہ روی بھی نبھائیے
یہ کیا کہ آپ صرف پرستش کریں قبول
معبود شہر میری خودی بھی نبھائیے
بے شک حضور ساقیٔ بزم بہار ہیں
لیکن خود اپنی تشنہ لبی بھی نبھائیے
ہاں ان حسین آنکھوں میں رقصاں ہے زندگی
پلکوں کی ہو سکے تو نمی بھی نبھائیے
شہزاد گان مملکت حسن کے طفیل
ہم شاعروں کی کج کلہی بھی نبھائیے
——
شگفتہ بچوں کا چہرہ دکھائی دینے لگے
میں کیا کروں کہ اجالا دکھائی دینے لگے
یہ سخت ظلم ہے مالک کہ صبح ہوتے ہی
تمام گھر میں اندھیرا دکھائی دینے لگے
وہ صرف میں ہوں جو سو جنتیں سجا کر بھی
اداس اداس سا تنہا دکھائی دینے لگے
میں کامیاب جبھی ہوں گا اے رباب حیات
کہ بزم کو ترا نغمہ دکھائی دینے لگے
گلاب اگانے کی عادت سے فائدہ کیا ہے
اگر گلاب میں شعلہ دکھائی دینے لگے
مرا ہی عکس سہی پھر بھی وہ فرشتہ ہے
جو غیر ہو کے بھی اپنا دکھائی دینے لگے
بہت علیل ہو لیکن یہ بزدلی ہے سلامؔ
کہ تم کو موت کا سایہ دکھائی دینے لگے
——
پھولوں کے دیس چاند ستاروں کے شہر میں
برباد ہو رہا ہوں نگاروں کے شہر میں
موج سمن میں زہر ہے باد صبا میں آگ
دم گھٹ رہا ہے یاسمیں زاروں کے شہر میں
آنسو ہوں ہنس رہا ہوں شگوفوں کے درمیاں
شبنم ہوں جل رہا ہوں شراروں کے شہر میں
وہ میں ہوں جس نے شعلۂ ساغر اچھال کر
کی ہے خزاں کی بات بہاروں کے شہر میں
یہ قلعہ اور یہ مسجد شاہ جہاں کا اوج
کس درجہ سرنگوں ہوں مناروں کے شہر میں
اے میری فطرت طرب آگیں خطا معاف
شرمندہ ہوں میں ظلم کے ماروں کے شہر میں
بس میں بنوں گا خسرو مہتاب اے سلامؔ
سوچا ہے یہ دھوئیں کے غباروں کے شہر میں
……………………………………..