پیر • 5 اکتوبر 2026ء
📚 کتب خانہ ۱۴۸٬۸۹۴

امداد امام اثر کی غزلیں — Imdad Imam Asar Ghazals

امداد امام اثر کی منتخب غزلیں اور نظمیں۔

کسی کا دل کو رہا انتظار ساری رات (غزل)

کسی کا دل کو رہا انتظار ساری رات

فلک کو دیکھا کئے بار بار ساری رات

تڑپ تڑپ کے تمنا میں کروٹیں بدلیں

نہ پایا دل نے ہمارے قرار ساری رات

ادھر تو شمع تھی گریاں ادھر تھے ہم گریاں

اسی طرح پہ رہے اشک بار ساری رات

خیال شمع رخ یار میں جلے تا صبح

لیا قرار نہ پروانہ وار ساری رات

نہ پوچھ سوز جدائی کو ہم سے اے ہم دم

جلا کیا یہ دل داغ دار ساری رات

مژہ کے عشق سے آئی نہ نیند آنکھوں میں

نظر کھٹکتی رہی بن کے خار ساری رات

خیال زلف سیہ میں بہا کئے آنسو

بندھا رہا مرے رونے کا تار ساری رات

نہ پوچھ ہم سے اثرؔ رات کس طرح کاٹی

عجب طرح کا رہا انتشار ساری رات

سمجھایا بہت دل کو سمجھانے کو کیا کہیے (غزل)

سمجھایا بہت دل کو سمجھانے کو کیا کہیے

دیوانہ ہے دیوانہ دیوانے کو کیا کہیے

آتے ہی چلے جانا کیا آنا ہے کیا جانا

اس آنے کو کیا کہیے اس جانے کو کیا کہیے

ہے شمع ستم آرا جو کہئے اسے کہئے

پروانہ ہے پروانہ پروانے کو کیا کہیے

بت خانہ و کعبہ میں یکساں ہے ترا جلوہ

کعبہ تو ہوا کعبہ بت خانے کو کیا کہیے

کیا کیا نہ کمال انساں کرتا ہے اثرؔ پیدا

صد حیف مگر اس کے مر جانے کو کیا کہیے

مزید غزلیں از امداد امام اثر ←ابھی کوئی غزل منسلک نہیں