بسمل دہلوی کی منتخب غزلیں اور نظمیں۔
یہ بھی نہیں امید کہ بیداد کرو گے (غزل)
یہ بھی نہیں امید کہ بیداد کرو گے
تم ایسے کہاں ہو کہ مجھے یاد کرو گے
کیا میرے لئے غیر کو ناشاد کرو گے
تم یوں بھی ستم ڈھاؤ گے بیداد کرو گے
دو چار گھڑی اور ہے دنیا میں بسیرا
اب ظلم کرو گے اگر آزاد کرو گے
یہ ہجر نہ جانے مجھے کیا وقت دکھائے
اور تم کسی بد بخت کو کیوں یاد کرو گے
تقدیر کے مارے کو ستانا نہیں اچھا
برباد کو تم اور کیا برباد کرو گے
میں خوب سمجھتا ہوں تمہاری یہ شرارت
ناشاد کرو گے تم اگر شاد کرو گے
تم جا تو رہے ہو مگر اتنا تو بتا دو
تقدیر کے مارے کو کبھی یاد کرو گے
تاثیر سے خالی نہیں بسملؔ کا تڑپنا
یہ یاد رہے تم کو کہ تم یاد کرو گے
محبت مسکراتی جا رہی ہے (غزل)
محبت مسکراتی جا رہی ہے
تمہاری یاد آتی جا رہی ہے
تمہاری مسکراہٹ یوں ہے جیسے
صبا غنچے کھلاتی جا رہی ہے
تمہاری دلبرانہ بے وفائی
مری ہستی بناتی جا رہی ہے
وہ جیسے جیسے کھلتے جا رہے ہیں
بہار آنچل اٹھاتی جا رہی ہے
یہ کون آیا ہے دریا کے کنارے
فضا میں لہر آتی جا رہی ہے
نسیم صبح سے کوئی یہ کہہ دے
گلوں کو کیوں ہنساتی جا رہی ہے
زمانہ کو سمجھتا جا رہا ہوں
صعوبت راس آتی جا رہی ہے
کوئی ہے نوش تشنہ لب ہے شاید
گھٹا آنسو بہاتی جا رہی ہے
اٹھی ہے گردش دوراں کی میت
گھٹا کاندھا لگاتی جا رہی ہے
بہت کم ظرف ہے بسملؔ یہ دنیا
یہی آواز آتی رہی ہے
اب جو وہ پاس سے کترا کے گزر جاتے ہیں (نظم)
اب جو وہ پاس سے کترا کے گزر جاتے ہیں
بے خودی میں کوئی تقصیر ہوئی ہے شاید
اب جو وہ آنکھ ملاتے ہوئے شرماتے ہیں
ذوق آوارہ کی تشہیر ہوئی ہے شاید
اب وہ اگلا سا انہیں ذوق تکلم بھی نہیں
ان کے ترشے ہوئے ہونٹوں پہ تبسم بھی نہیں
یا تو وہ بار جوانی سے پریشان سے ہیں
یا انہیں چھیڑتی رہتی ہے محبت کی نظر
یا تمناؤں نے طوفان اٹھا رکھا ہے
یا کھٹکتی ہے کلیجے میں شرارت کی نظر
ورنہ یوں بنتی ہوئی بات بگڑتی ہے کبھی
جو نظر مل گئی اک بار وہ لڑتی ہے کبھی