بسمل عارفی کی منتخب غزلیں اور نظمیں۔
جھنکار کا رشتہ تو ہے زنجیر سے سائیں (غزل)
جھنکار کا رشتہ تو ہے زنجیر سے سائیں
کیوں لوگ پریشاں ہوئے تعبیر سے سائیں
کچھ لوگ ابھی شہر میں ایسے بھی ہیں خوش پوش
جو آگ لگا دیتے ہیں تقریر سے سائیں
حق بولنے کا حوصلہ اب ہم میں نہیں ہے
نسبت تو نکلتی رہی شبیر سے سائیں
تدبیر پہ موقوف ہے دنیا کی حکومت
ہم لوگ الجھتے رہے تقدیر سے سائیں
رہنے دو ابھی آئنہ خانے میں کوئی عکس
کچھ دل تو بہل جاتا ہے تصویر سے سائیں
پہلے ہی بہت دیر ہوئی آنے میں ان کے
اب جان نکل جائے گی تاخیر سے سائیں
تدبیر کچھ ایسی کرو الفت کے نگہباں
بچھڑے نہ کوئی رانجھا کسی ہیر سے سائیں
جب وہ کہتا ہے سمندر ہے کنایہ اس کا (غزل)
جب وہ کہتا ہے سمندر ہے کنایہ اس کا
رنگ یک لخت بدلتا ہے سراپا اس کا
کب پکارے گا بھلا نام بھنور سے میرا
کب بھلا آئے گا پھر موج میں دریا اس کا
دل تو تہذیب انا کا ہے پرستار مگر
کیا کرے کوئی جو ہو جائے اشارہ اس کا
کب سنوارے گا وہ تقدیر مرے لفظوں کی
کب نظر آئے گا اشعار میں چہرہ اس کا
خود کو اس طرح سے گمنام کیا ہے اس نے
شہر تو شہر رہا بھی نہیں صحرا اس کا
میں تو بدنام سہی خیر کوئی بات نہیں
چاند جو دیکھتا رہتا ہے دریچہ اس کا
ساتھ جب دونوں چلے تھے تو کہاں چوک ہوئی
میرا کوئی بھی نہیں اور زمانہ اس کا
آگرہ شہر میں محبت کا (نظم)
آگرہ شہر میں محبت کا
ایک مینار جگمگاتا ہے
لوگ کہتے ہیں جس کو تاج محل
میرے دل کو بہت لبھاتا ہے
روشنی پھوٹتی ہے جالی سے
باغ میں پھول مسکراتے ہیں
لوگ پہلو میں بیٹھ کر اس کے
ہائے کتنا سکون پاتے ہیں
روح جس میں نہیں پہ ہے زندہ
تم نہ مانو مگر حقیقت ہے
وقت دھندلا نہ کر سکا جس کو
یہ محبت کی وہ عمارت ہے
کرۂ ارض پر عجوبہ ہے
کیسے انکار ہو ودیعت سے
فخر ہندوستاں کو ہے اس پر
تاج کو دیکھیے عقیدت سے
دیکھنا ہو کبھی تو آ جانا
درس وہ کس طرح سے دیتے ہیں
چاہنے والے تاج میں بسملؔ
عکس محبوب دیکھ لیتے ہیں