اکرم محمود کی منتخب غزلیں اور نظمیں۔
اب دل بھی دکھاؤ تو اذیت نہیں ہوتی (غزل)
اب دل بھی دکھاؤ تو اذیت نہیں ہوتی
حیرت ہے کسی بات پہ حیرت نہیں ہوتی
اب درد بھی اک حد سے گزرنے نہیں پاتا
اب ہجر میں وہ پہلی سی وحشت نہیں ہوتی
ہوتا ہے تو بس ایک ترے ہجر کا شکوہ
ورنہ تو ہمیں کوئی شکایت نہیں ہوتی
کر دیتا ہے بے ساختہ بانہوں کو کشادہ
جب بچ کے نکل جانے کی صورت نہیں ہوتی
دل خوش جو نہیں رہتا تو اس کا بھی سبب ہے
موجود کوئی وجہ مسرت نہیں ہوتی
یوں بر سر پیکار ہوں میں خود سے مسلسل
اب اس سے الجھنے کی بھی فرصت نہیں ہوتی
اب یوں بھی نہیں ہے کہ وہ اچھا نہیں لگتا
یوں ہے کہ ملاقات کی صورت نہیں ہوتی
یہ ہجر مسلسل کا وظیفہ ہے مری جاں
اک ترک سکونت ہی تو ہجرت نہیں ہوتی
دو چار برس جتنے بھی ہیں جبر ہی سہہ لیں
اس عمر میں اب ہم سے بغاوت نہیں ہوتی
زخم دیکھے نہ مرے زخم کی شدت دیکھے (غزل)
زخم دیکھے نہ مرے زخم کی شدت دیکھے
دیکھنے والا مری آنکھوں کی حیرت دیکھے
مجھ پہ آساں ہے کہے لفظ کا ایفا کرنا
اس کو مشکل ہے تو وہ اپنی سہولت دیکھے
دل لئے جاتا ہے پھر کوئے ملامت کی طرف
آنکھ کو چاہئے پھر خواب ہزیمت دیکھے
کوئی صورت ہو کہ انکار سے پہلے آ کر
کس قدر اس کی یہاں پر ہے ضرورت دیکھے
دل تذبذب میں ہی رہتا ہے بوقت پیماں
لفظ دیکھے کہ رخ یار کی رنگت دیکھے
آنکھ بھر جاتی ہے اس کثرت نظارہ سے
دل تو ہر شکل میں بس ایک شباہت دیکھے