اکرم جاذب کی منتخب غزلیں اور نظمیں۔
روز اول ہی خطا کار بنایا گیا ہوں (غزل)
روز اول ہی خطا کار بنایا گیا ہوں
اور پھر اشرف مخلوق بتایا گیا ہوں
ٹوٹنے اور بکھرنے پہ ہے واویلا کیوں
دیکھیے کتنی بلندی سے گرایا گیا ہوں
اختیارات سے تقدیر سے کیا لینا ہے
وقت کی گرد میں تنکا سا اڑایا گیا ہوں
زندگی ایک ڈگر پر ہی کہاں چلتی ہے
کبھی دیوار کبھی دل سے لگایا گیا ہوں
دونوں ہاتھوں سے لٹاتے ہوئے یہ تو سوچیں
کتنی محنت سے محبت سے کمایا گیا ہوں
میں نہ یوسف ہوں نہ ہے کوئی خریدار مرا
جانے کیا سوچ کے بازار میں لایا گیا ہوں
امتحاں دینے تلک یاد جنہیں رکھا جائے
ان سوالات کی مانند بھلایا گیا ہوں
نوک خنجر سے سہی وقت کے ہاتھوں لیکن
گدگدی کر کے کئی بار ہنسایا گیا ہوں
اس زمانے کا ہوں میں ایک ہنسی کا مقروض
جس کی پاداش میں اک عمر رلایا گیا ہوں
مسئلہ یوں ہی نہیں پیش فشار خوں کا
خود سے الجھایا گیا اور لڑایا گیا ہوں
اجنبی لوگ زمیں زاد نہیں لگتے ہیں
اور سیارے پہ شاید میں بسایا گیا ہوں
کنفیوشس ہو کہ نانک ہو کہ بدھا گوتم
سو طریقوں سے سبق ایک پڑھایا گیا ہوں
لاکھ پردوں میں سہی میری حقیقت ملفوف
میں بہ ہر رنگ زمانے کو دکھایا گیا ہوں
مجھ کو ماحول موافق نہیں آیا جاذبؔ
پھول ہوں اور سر دشت کھلایا گیا ہوں
بیٹھا ہوں اپنی ذات کا نقشہ نکال کے (غزل)
بیٹھا ہوں اپنی ذات کا نقشہ نکال کے
اک بے زمین ہاری ہوں صحرا نکال کے
ڈھونڈا بہت مگر کوئی رستہ نہیں ملا
اس زندگی سے تیرا حوالہ نکال کے
الماری سے ملے مجھے پہلے پہل کے خط
بیٹھا ہوا ہوں آپ کا وعدہ نکال کے
ویرانیوں پہ آنکھ چھما چھم برس پڑی
لایا ہوں میں تو دشت سے دریا نکال کے
آسانیاں ہی سوچتے رہتے ہیں یار لوگ
عقبیٰ نکال کر کبھی دنیا نکال کے
ہم رفتگاں سے ہٹ کے بھی دیکھیں تو شعر میں
موضوع کم ہی بچتے ہیں نوحہ نکال کے
ملنا کہاں تھا سہل در آگہی مجھے
آیا ہوں میں پہاڑ سے رستہ نکال کے
واعظ نہال آج خوشی سے ہے کس قدر
اک تازہ اختلاف کا نکتہ نکال کے
منعم کو اس نوالے کی لذت کا کیا پتا
مزدور جو کمائے پسینہ نکال کے
حالات کیا غریب کے بدلے کہ ہر کوئی
لے آیا ہے قریب کا رشتہ نکال کے
جاذبؔ کہاں خبر تھی کہ ہے باز تاک میں
ہم شاد تھے قفس سے پرندہ نکال کے