عبدالرحمان واصف کی منتخب غزلیں اور نظمیں۔
میز قلم قرطاس دریچہ سناٹا (غزل)
میز قلم قرطاس دریچہ سناٹا
کمرا کھڑکی زرد اجالا سناٹا
میری آنکھوں میں دھندلائی گہری چپ
اور چہرے پر اترا پیلا سناٹا
میری آنکھوں میں لکھی تحریر پڑھو
ہجر تمنا وحشت صحرا سناٹا
گونج اٹھی ہے میرے اندر خاموشی
نس نس میں گھٹ گھٹ کر بہتا سناٹا
اس کے ساتھ چلی آتی تھیں قلقاریں
اس کے بعد ہوا ہے کتنا سناٹا
پہلے میری ذات میں تھا موجود کوئی
اب ہے میری ذات کا حصہ سناٹا
جھاگ اڑاتے دریا کے ہنگامے پر
نقش ہوا دل پر افسردہ سناٹا
میں نے گھنٹوں اس امید پہ چپ سادھی
شاید کہ وہ توڑ ہی دے گا سناٹا
مل کر بین کریں سب میری ہجرت پر
چاند اداسی جھیل کنارا سناٹا
روز وحشت کوئی نئی مرے دوست (غزل)
روز وحشت کوئی نئی مرے دوست
اس کو کہتے ہیں زندگی مرے دوست
علم احساس آگہی مرے دوست
ساری باتیں ہیں کاغذی مرے دوست
دیکھ اظہارئیے بدل گئے ہیں
یہ ہے اکیسویں صدی مرے دوست
کیا چراغوں کا تذکرہ کرنا
روشنی گھٹ کے مر گئی مرے دوست
ہاں کسی المیے سے کم کہاں ہے
مری حالت تری ہنسی مرے دوست
ساتھ دینے کی بات سارے کریں
اور نبھائے کوئی کوئی مرے دوست
اتنی گلیاں اگ آئیں بستی میں
بھول بیٹھا تری گلی مرے دوست
لازمی ہے خرد کی بیداری
نیند لیکن کبھی کبھی مرے دوست
ہائے کیا دن تھے وہ (نظم)
ہائے کیا دن تھے وہ
جب نظر میں محبت کا احساس تھا
ایک اک لفظ احساس کا داس تھا
اپنا ہر ایک لمحہ بہت خاص تھا
سب خوشی کے پرند
اپنے آنگن کے پنجرے میں تھے
چاند خوشبو صبا رنگ نم تتلیاں
قہقہے چشم و دل کے جھروکے میں تھے
ہم کسی کی نگاہوں کے حلقے میں تھے
ساری دنیا کے سکھ اپنے لہجے میں تھے
ہم تو نشے میں تھے
چاند تاروں سے گپ شپ کا معمول تھا
سنگ ریزہ بھی اپنے لیے پھول تھا
یہ بلا کا سفر بھی فقط دھول تھا
اب یہ حالات ہیں
ہم امنگوں کی اجڑی ہوئی رات ہیں
سبز پیڑوں سے بچھڑے ہوئے پات ہیں
حرف ہیہات ہیں
یہ ترے ہجر ہی کے کرامات ہیں
اب کوئی روشنی
کم نظر کی نگاہوں کو بھاتی نہیں
کوئی سپنوں کی لو
آنکھ کی پتلیوں میں اجالا جگاتی نہیں
اب سماعت کو کوئی مدھرتا لبھاتی نہیں
کوئی ہمدم نہیں کوئی ساتھی نہیں
نیند آتی نہیں