عبد العزیز خالد کی منتخب غزلیں اور نظمیں۔
قرب نس نس میں آگ بھرتا ہے (غزل)
قرب نس نس میں آگ بھرتا ہے
وصل سے اضطراب بڑھتا ہے
میں فقط ایک خواب تھا تیرا
خواب کو کون یاد رکھتا ہے
آج کی شب شب قیامت ہے
دل مرا بے طرح دھڑکتا ہے
فقر کیا ہے بہ دوست پیوستن
غم کا عرفاں ہے آگہی کیا ہے
میں ملاتا ہوں شعر و آتش کو
فن مجھے کیمیا کا آتا ہے
توشۂ راہ عشق ہے اندوہ
غم دلوں کو قریب لاتا ہے
شعر تازہ ہے تحفۂ شاعر
مشک نافہ ہرن نے اگلا ہے
قلت کلفت و تکلف میں
راحت قلب نا شکیبا ہے
عیش ناپائیدار پر نازاں
آدمی کتنا بھولا بھالا ہے
جان کا صرفہ ہو تو ہو لیکن
صرف کرنے سے علم بڑھتا ہے
کسے پاس مراتب الفاظ
حشر معنی سے قتل برپا ہے
پا کے غافل کہیں نہ ڈس لے تمہیں
ڈرو اس سے جو تم سے ڈرتا ہے
مقصد اثبات ذات ہے اس سے
کیا گلے کا سبب بھی ہوتا ہے
سچے تخلیق کار کی مانند
اونگھتا ہے خدا نہ سوتا ہے
آب و رنگ حیات ہے اس سے
آرزو جاگتوں کا سپنا ہے
میرے مولا کریم نے مجھ کو
غیر مطبوع ذہن بخشا ہے
یوں لگے جیسے پردۂ سیمیں
آنکھ کیا روح کا دریچہ ہے
کس نے دیکھا ہے پردۂ ظلمات
دل کے بھیدوں کو کس نے پایا ہے
کون مر کر دوبارہ زندہ ہوا
کون ملک فنا سے لوٹا ہے
کر کے یکسر مجھے نظر انداز
کس سے دل ہم کلام رہتا ہے
باوجود فشار شب ہمہ شب
حسن ہر صبح تازہ ہوتا ہے
ہر بن مو بنا ہے پردۂ ساز
دل کے تاروں کو کس نے چھیڑا ہے
بات عبدالعزیز خالدؔ کی
داستان امیر حمزہ ہے
زمیں نژاد ہیں لیکن زماں میں رہتے ہیں (غزل)
زمیں نژاد ہیں لیکن زماں میں رہتے ہیں
مکاں نصیب نہیں لا مکاں میں رہتے ہیں
وہ ڈول ڈالیں کسی کار پائیدار کا کیا
جو بے ثباتیٔ عمر رواں میں رہتے ہیں
ہم ایسے اہل چمن گوشۂ قفس میں بھی
حساب خار و خس آشیاں میں رہتے ہیں
نہ بود و باش کو پوچھو کہ ہم فقیر منش
سخن کے معبد بے سائباں میں رہتے ہیں
کہاں تلاش کرو گے ہمیں کہ ہم تو مدام
حضوریٔ دل بے خانماں میں رہتے ہیں
نشے کی لہر میں خم خم لنڈھا کے آب حیات
سراب زندگیٔ جاوداں میں رہتے ہیں
نئی محبتیں خالدؔ پرانی دوستیاں
عذاب کشمکش بے اماں میں رہتے ہیں
تمام عمر دل خود نگر کی نذر ہوئی (نظم)
تمام عمر دل خود نگر کی نذر ہوئی
ادھورے خواب ہیں دامن میں تشنہ لب باتیں
گلو گرفتہ گلے بے اثر مناجاتیں
جو گھٹ کے مر گئیں سینے میں وہ ملاقاتیں
جو کروٹوں میں کٹیں وہ گناہ کی راتیں
بہ شوق قدر کہیں جن کی قدر ہو نہ سکی
وہ ارمغان نوا وہ سخن کی سوغاتیں
بہ نام حسن وہ چٹھی جو ڈر کی نذر ہوئی
زمانے کی نگۂ کج نظر کی نذر ہوئی
تمام عمر دل پر حذر کی نذر ہوئی
بکار گزری ہے جانے کہ رائیگاں گزری