عباس تابش کی منتخب غزلیں اور نظمیں۔
دشت میں پیاس بجھاتے ہوئے مر جاتے ہیں (غزل)
دشت میں پیاس بجھاتے ہوئے مر جاتے ہیں
ہم پرندے کہیں جاتے ہوئے مر جاتے ہیں
ہم ہیں سوکھے ہوئے تالاب پہ بیٹھے ہوئے ہنس
جو تعلق کو نبھاتے ہوئے مر جاتے ہیں
گھر پہنچتا ہے کوئی اور ہمارے جیسا
ہم ترے شہر سے جاتے ہوئے مر جاتے ہیں
کس طرح لوگ چلے جاتے ہیں اٹھ کر چپ چاپ
ہم تو یہ دھیان میں لاتے ہوئے مر جاتے ہیں
ان کے بھی قتل کا الزام ہمارے سر ہے
جو ہمیں زہر پلاتے ہوئے مر جاتے ہیں
یہ محبت کی کہانی نہیں مرتی لیکن
لوگ کردار نبھاتے ہوئے مر جاتے ہیں
ہم ہیں وہ ٹوٹی ہوئی کشتیوں والے تابشؔ
جو کناروں کو ملاتے ہوئے مر جاتے ہیں
ہنسنے نہیں دیتا کبھی رونے نہیں دیتا (غزل)
ہنسنے نہیں دیتا کبھی رونے نہیں دیتا
یہ دل تو کوئی کام بھی ہونے نہیں دیتا
تم مانگ رہے ہو مرے دل سے مری خواہش
بچہ تو کبھی اپنے کھلونے نہیں دیتا
میں آپ اٹھاتا ہوں شب و روز کی ذلت
یہ بوجھ کسی اور کو ڈھونے نہیں دیتا
وہ کون ہے اس سے تو میں واقف بھی نہیں ہوں
جو مجھ کو کسی اور کا ہونے نہیں دیتا
کسی کے بعد (نظم)
کسی کے بعد
اپنے ہاتھوں کی بد صورتی میں کھو گئی ہے وہ
مجھے کہتی ہے تابشؔ! تم نے دیکھا میرے ہاتھوں کو
برے ہیں ناں؟
اگر یہ خوب صورت تھے تو ان میں کوئی بوسہ کیوں نہیں ٹھہرا''
عجب لڑکی ہے
پورے جسم سے کٹ کر فقط ہاتھوں میں زندہ ہے
صراحی دار گردن نرم ہونٹوں تیز نظروں سے وہ بد ظن ہے
کہ ان اپنوں نے ہی اس کو سر بازار پھینکا تھا
کبھی آنکھوں میں ڈوبی
اور کبھی بستر پہ سلوٹ کی طرح ابھری
خود کو ڈھونڈتی ہے
اپنے ہاتھوں کی لکیروں میں
جہاں وہ تھی نہ ہے، آئندہ بھی شاید نہیں ہوگی
وہ جب انگلی گھما کر
فیضؔ کی نظمیں سناتی ہے
تو اس کے ہاتھ سے پورے بدن کا دکھ جھلکتا ہے
وہ ہنستی ہے تو اس کے ہاتھ روتے ہیں
مجھے کہتی ہے ''تابشؔ! تم نے دیکھا میرے ہاتھوں کو
برے ہیں ناں''؟
میں شاید گر چکا ہوں اپنی نظروں سے
میں چھپنا چاہتا ہوں اس کے تھیلے میں
جہاں سگریٹ ہیں ماچس ہے
جو اس کا حال ماضی اور مستقبل!
آئے تو خوشی کی طرح آتی ہے
اسے مجھ سے محبت ہے
کہ شاید مجھ میں بھی بد صورتی ہے اس کے ہاتھوں کی!