ہم بھی دیکھیں تو کہیں جنسِ وفا کی صورت
کوئی بتلائے وہ بازار کدھر لگتا ہے
…
پروفیسر محمد آفاق صدیقی کا یوم وفات
June 17/18, 2012
پیدائش:
4 مئی 1928 ء ۔۔ فرخ آباد ، اتر پردیش، برطانوی ہندوستان
وفات:
17 جون 2012 ء ۔۔ کراچی ، پاکستان
…..
کیا زمیں کیا آسماں کچھ بھی نہیں
ہم نہ ہوں تو یہ جہاں کچھ بھی نہیں
دیدہ و دل کی رفاقت کے بغیر
فصل گل ہو یا خزاں کچھ بھی نہیں
پتھروں میں ہم بھی پتھر ہو گئے
اب غم سود و زیاں کچھ بھی نہیں
کیا قیامت ہے کہ اپنے دیس میں
اعتبار جسم و جاں کچھ بھی نہیں
کیسے کیسے سر کشیدہ لوگ تھے
جن کا اب نام و نشاں کچھ بھی نہیں
ایک احساس محبت کے سوا
حاصل عمر رواں کچھ بھی نہیں
کوئی موضوع سخن ہی جب نہ ہو
صرف انداز بیاں کچھ بھی نہیں
…
محرم جاں کوئی دیوار نہ در لگتا ہے
اپنا گھر اب تو کسی اور کا گھر لگتا ہے
ہم بھی دیکھیں تو کہیں جنسِ وفا کی صورت
کوئی بتلائے وہ بازار کدھر لگتا ہے
…..
یہ دلیل ِ قُربِ مدام ہے کہ جو فاصلہ تھا مٹا دیا
ترے ہر خیال کو درد نے مرا ہم خیال بنا دیا
تری آرزو کے سوا اگر مری خواب گاہِ خیال میں
کبھی جاگ اٹھی کوئی آرزو تو تھپک تھپک کے سلا دیا
…….
ہے وہی دنیا وہی ہم ہیں مگر تیرے بغیر
سونے سونے سے ہیں یہ شام و سحر تیرے بغیر
راس کیا آئے گی کوئی رہ گزر تیرے بغیر
کیسے طے ہو گا یہ غربت کا سفر تیرے بغیر
روشنی تھی جن چراغوں سے وہ سارے بجھ گئے
ماتمی ہیں آج سب دیوار و در تیرے بغیر
رو بہ رو اک ڈھیر ہے مٹی کاباقی کچھ نہیں
اب نہ گھروالے سلامت ہیں نہ گھر تیرے بغیر
کھو گئیں وہ صورتیں سب جانی پہچانی ہوئی
کس کو دیکھوں اور کیاآئے نظر تیرے بغیر
رہ گیا ہوں پھڑ پھڑا کر زندگی کے جال میں
ایک پنچھی کی طرح بے بال و پر تیرے بغیر
چھوڑ کر اس حال میں او جانے والے دیکھ تو
بوجھ کتنا ہے دل آفاق پرتیرے بغیر

جواب دیں
تبصرہ کرنے سے پہلے آپ کا لاگ ان ہونا ضروری ہے۔